يم قلب ينضح محنه.. ويم سوالف وافيه
ويم دمع يجري اعلى كلشي..الجنه حدرج خافيه
يلي جنه انام وانتي انجان عينج غافية
الشمس لو مو نور وجهج عندي ظلمة وطافيه
الخبزه من ايدج لذيذه وبيهه كل العافية
وجنه من كون انتمرض مسحت ايدج كافية
كلهه مدغوشة النوايا وانتي نيتج صافيه
الدنيا من يوم الجفيتج مدبره ومتجافيه
****
اتغربت يايمه عنكم وبالغرب شفت العجايب
صبت الدنيا اعلى راسي اشكال واصناف المصايب
علمتني الغربه يمه الماله ام ماله حبايب
وعلمتني الغربه يمه الماله ام بالكون سايب
ابيوت مابيه امهات تصير مهجوره وخرايب
زاد مو امك تطبخه طابخه بجدر النوايب
وانته يلي فاجد امك روح هج بالجول خايب
هي تدفعلك عمرهه والبشر تاخذ ضرايب
****
يمه قلب الناس صخره وبس شفت قلبج عجين
الله لو ما خالق امي ماكو بالدنيا حنين
ريحتج ريحت الجنه وانتي في حظنج ضخين
ومن يون بالليل واحد اوياج تسبين الونين
بس لغة حبج فصاحه وكل حجي الوادم رطين
انكطعت احبال الموده وبس حبل ودج متين
المايحب امه ثبتلي جاحد وما عنده دين
كون ارد اسبوع واحد بالعمر جاهل جنين
واسمع اشلون التلولي وانسى نكبات السنين
الوادم تغير لبنهه بهالوكت واصبح شنين
يمه طحنتي الليالي وكامت تذري الطحين
لا كرابه ولا خرابه ومامش اخوان التعين
وصار حفنه سنين بارج خوش برجه وخوش طين
*واني توني اعرفت يمه شكثر سعر الام ثمين *
رد مع اقتباس
