معالي الوزير و”عيشها غير”..
ابتداءاً من السابعة والنصف صباحاً أمطرت عصابة “زهران علوش”العاصمة دمشق بوابل من الصواريخ والقذائف..
التوقيت لئيم من حيث هو وقت الموظفين والتلاميذ وطلاب الجامعات..
حالة هلع شديدة عند الناس وبالأخص أهالي التلاميذ الذين تراكضوا -البعض منهم حفاة- الى مدارس أطفالهم للاطمئنان واعادتهم الى المنازل..
مش رح احكي سياسة على بكرة الصبح وتحليل سياسي وميداني وأسباب القصف وعملية الجيش أمس على دوما معقل المجرم علّوش.. بدي احكي غير شي..غير كليّاً
لاحظوا معي من فضلكم المشهد الاعلامي الرسمي السوري والدنيا مولعة والقصف على أبو موزة ومن فج وغميق وماحدا عارف شي من شي وبالتأكيد هناك اصابات وضحايا عدا عن الدمار والحرائق..
المشهد الاعلامي الرسمي أثناء القصف:
“الاخبارية السورية “تضع خبراً بمنتهى الأهمية والخطورة:
“وزارة السياحة تقيم معرضاً للتصوير الضوئي بمناسبة احتفالية القديس “اليان الحمصي” في “سان باولو” يستمر اسبوعاً.”
شي مهم والله..!
“الفضائية السورية” :
المذيعة الغندورة عاملة لوحة سوريالية بوجّا دالقة تشكيلة بويا ودهانات على خلقتا تحتوي كل ماهو معروف من ألوان بالدنيا وماهو لم يكتشف بعد!..
المذيعة الغندورة باطار برنامج صباحي اسمو “حلو الكلام” تفتح البرنامج بتقديم فقرة الأبراج اللي بحسب ماخبرتنا المذيعة انّو نحنا ناطرينا بفارغ الصبر..
طلّ علينا “المتنبىء” يللي ناطرينو بفارغ الصبر ومامعنا خبر -والقذائف عم تشتي على روسنا- وأخبرنا بأنّ كوكب “زحل” قرطو لبطة لكوكب “المشتري” جابو بحضن كوكب “المريخ” ماأدّى الى تدخل عاجل من كوكب “الزهرة ” -المقليّة بركي-لحل النزاع الفلكي الناشب بين الرفاق في المجموعة الشمسيّة وتمّت الصلحة وعادت الأمور “لمجرورها” ومجاريها وبالتالي مافي قلق على الابراج الترابية من هلق للسبت ..!
الحمدالله ياربي ارتحت وارتاح بالي ..شنّو لأنّو كنت هكلان هم الأبراج الترابيّة وماعم نام الليل..وعقبال ماتنفرج على الأبراج الناريّة قادر ياكريم..
قناة “تلاقي” متل العادة -وخصوصاً بعد مادخلت “غينيس” السلام على اسمو -“عايشتها غير” حسب شعارها..غير كليّاً ..غير كل شي الله خلقوا من مدارس اعلاميّة..
حاطّة وثائقي عن “طريق الحرير” وحاطّة مشاهد من فيلم الناصر صلاح الدين من بطولة “أحمد مظهر ونادية لطفي” صوّرهُ وأخرجه “يوسف شاهين” بستينات القرن المنصرم..
شو بدنا بالحكي ..غير لمّا تعيشها غير وانتا تحت القصف وعم تتابع التلفزيون الرسمي -على مولدة الكهربا ومحروق سلاّفك حتى تأمّن بنزين المولدة- بركي وعلى أمل بتعرف شو عم يصير حولك وتحديداً بخصوص “الأبراج والقديس اليان الحمصي والناصر صلاح الدين”..!
معالي “الافوكاتو” وزير الاعلام السوري :
صباح الخير ياباشا..شو معلم؟ فقت من النوم؟ شربت قهوتك؟ كيف مزاجك مولانا؟ بيهمنا تكون رايق..
ايمتى عالمزبوط من بعد أمرك ممكن توصل لمكتبك وتتابع مايجري وتقوم باعطاء توجيهاتك “الحكيمة” للفضائيات السوريّة الرسميّة التابعة لسيادتك بركي بيحطولنا “عاجل” شي الساعة 7 المسا عن سقوط صواريخ وقذائف على العاصمة..
وهيك بمعيتك ومعيّة رب العالمين نحن الجماهير الغفورة ومعاليك “منعيشها غير”!
خصوصاً معاليك بالاعلام الحق يُقال انّك “غير”..
غير كليّاً..!
- بانوراما الشرق الأوسط
طوني حداد
رد مع اقتباس
