عونك ياوطن يابو الحضارات
احضنك لو صرت كلك سجاجين
اخاف احجي ومنو ايصدك الخرافات
الك حبي سوالف عالسلاطين
يابو الخير انت تفيض خيرات
عله الجيران وعيالك مساكين
حيطانك صفت بس للشعارات
اهواي احزاب وشويه الحياطين
بينك والعرب قست المسافات
مثل بعد النبي عن الشياطين
العروبة والعروبة وهالتفاهات
حدر جدمك اقدمهم قرابين
عراق الياوكت للضيف تشعل نار
وبهدومك تطب لو جاع خطارك
امس جارك سكت بالجذب مامربيك
وانت اتصب حزن من ينجرح جارك
يضل ثارك كصب كلما نكصه ايطول
شوكت سيفك تغمده وينوخذ ثارك
دكه اعله الخشب لتدكه عالحيطان
وعله شيل الصور لتعلمه بسمارك
ولترد بدرب مابي عذر واتيه
وجيب اويه النذر سجينة اعذارك
عله المرمر غلط لاتخسر المنشار
كص خاوي الخشب ينهاب منشارك
واشمر يوسفك بس ذب وراه اتراب
مو كل بير صدك يحفظ اسرارك
امس كل العرب وكفوا مع الجلاد
يمدونه حطب من تنخمد نارك
عمر موسى الشمر والجامعة ابن ازياد
وعراق انته الحسين وشعبك انصارك
انه هذا الوطن حالفله بالعباس
ماخونك كلتله شما قست نارك
رد مع اقتباس
المشاركة الأصلية كتبت بواسطة Hakan Hakan
