دنياك لو تسوى من الحِزن ذرّه
ما كان تاليها توابيت وقبور
وما كان للكافر بعمره مسره
وما شفت في ملكه ملايين وقصور
العمر يمضي بين حلوه ومره
والموت حق وقابض الروح مأمور
دام الحياه الفانية مستقرة
ورزقك يجيك وبين الأجواد مستور
لا تنشغل بالوقت برده وحره
واحذر تصير بقسمة الناس مقهور
وحكم القدر لاجاك خيره وشره
أشكر عظيم الشأن والذنب مغفور
والمجلس اللي يزعجك لا تمره
خله تراك بشوفته منت مجبور
ساعات صمــتٍ ما وراها مضــره
تسوى الكلام اللي به إذنوب وشرور
اطلق خيالك وأترك النفس حره
وخل الطبيعة في حياتك لها دور
وبالليل لا بانــت نجــوم المجــرة
اذكر بديع الخلق بـِ إحـساس وشعور
واسجد لرب الكُــون مـره ومـره
واحفظ لسانك وأترك الكذب والزور
وفروض ربــك خلهــا مستمــرة
وطاعتك لا يدخل بها نقص وقصور