هذا حوار بيني و بين أحد الأصدقاء بخصوص نوع متصفحه ..الصديق هو (أحمد الأوسي) .. و أنا هو (أنا)
أحمد : أكللك ..عندي مشاكل باستخدام المنتدى
أنا: إنته شنو المتصفح اللي تستخدمه؟
أحمد : شنو يعني يا متصفح .. هو اني ادخل من الكوكل للمنتدى
أنا: شنو علاقة الـ كوكل، هو موقع مثل موقعنا .. شنو علاقته بالمتصفح اللي تستخدمه
أحمد: لعد شنو قصدك؟
أنا: إنته وين تدوس علمود يطلع عندك الـ كوكل؟
أحمد: أدوس على أيكونة زركة مثل حرف الـ e
أنا: أها .. بالضبط .. هاي الايكونة مال برنامج المتصفح
أحمد: بس هاي هية موجودة أصلا..يعني اني ما منصبها
أنا: اي طبعا موجودة أصلا .. لأن هي موجودة ضمن برامج النظام (الويندوز) مالتك من نصبوه إلك
أحمد: زين زين .. لعد ليش يطلع الكوكل أول ما ادوس عليها ؟
أنا: مو اكو واحد من خيارات هذا البرنامج اسمه (الصفحة الرئيسية) ..تحدد بيه شنو الموقع اللي ينفتح أول ما تدوس على الايكونة مال متصفح الانترنيت، يعني تكدر تغيره هذا الخيار و تخلليه مثلا شبكة اصدقاء الكوت ينفتح اول شي بدل الـ كوكل
أحمد: أها .. خوش حجاية، زين لعد شنو قصدك بالسؤال الاول(شنو نوع المتصفح) ؟؟ إذا تعرف هاي الأشياء
أنا: أني ما جنت أعرف، بس من كتلي أكو ايكونة زركة مثل حرف e و ما منصب كلشي ..عرفت أنه انته تستخدم متصفح الاكسبلورير ( Internet Explorer) السادس من مايكروسوفت
أحمد: السادس شنو ؟
أنا: السادس يعني الإصدار رقم 6 من متصفح الـ Internet Explorer و هذا الإصدار هو اللي موجود اصلا بصورة اعتيادية من نصبولك الحاسبة
أحمد: زين أكو إصدارات أحدث أجتي ورة السادس ؟
أنا: اي طبعا .. أكو وراه السابع و وراه الثامن (Internet Explorer 7 ، Internet Explorer 8)
أحمد: زين شلون أفرق بيناتهم؟
أنا: تكدر من خلال شكل الايكونة مثلا
أحمد: شلون يعني ؟
أنا: باوع: هي كلها على شكل حرف e بس السادس ..تصير الـ e زركة و صافية، بينما السابع و الثامن تصير الـ e داير مدايرها شريط ذهبي
أحمد: باوع .. اني إلا اشوف الصورة يالة افتهم شنو السالفة
أنا: باوع السادس تصير الايكونة مالته هيج:
بينما السابع و الثامن .. تصير الايكونة مالته هيج
أحمد: أها كلش كلش خوش .. بس شلون افرق بين السابع و الثامن؟
أنا: كلش بسيطة .. مجرد أنه تفتح النافذة مال المتصفح .. راح تشوف أكو شريط مال ايعازات اسمه (شريط القوائم) (ما اله علاقة بالموقع اللي تتصفحه بهذيج اللحظة ..يعني دائما موجود هذا الشريط)
..راح تشوف بيه ايعازات مثل (File, Edit, View, Tools, Help)
أحمد: إي صحيح موجود فوك.. و بعدين ؟
أنا: تروح على الإيعاز Help اللي صاير بالنهاية (على ايدك اليمنة) و تدوس عليه راح تنفتح قائمة .. تروح على أخر أمر بيه اسمه (About) راح تدوس عليه تنفتح نافذة كبالك راح تلكي بيها رقم الإصدار مال المتصفح مالتك
أحمد: فتحتها بس كلشي ما افتهمت ؟
أنا: شني السالفة بوية، إذا ما لكيت الرقم كبالك موجود ..راح تلكي كلمة version (يعني اصدار) و كبالة اكو رقم الإصدار (عادة يكون رقم طويل مثلا 8.5.7700.1.2) انته عليك بأول رقم على ايدك اليسرى هو رقم الإصدار مالتك يعني بهذه الحالة (8)
أحمد .. هسة افتهمت .. اني لكيت الرقم مكتوب (6.8.7001.4.34) .. يعني الاصدار مالتي رقمه هو (6) .. السادس يعني عندي
أنا: إي يا معود .. مو شلعت كلبي
أحمد: زين أكو بعد متصفحات مو من مايكروسوفت ؟ يعني غير الاكسبلورير السادس و السابع و الثامن ؟
أنا: اي طبعا اكو
أحمد مثليش ؟
أنا: مثل الفايرفوكس (Firefox) و الـ كوكل كروم (Google Chrom) و أكو بعد هواي
أحمد: هاااا .. زين يعني شنو الفرق بيناتهن
أنا: باوع .. المتصفحات مثل الفايرفوكس و الكوكل كروم ..يصيرن اسرع بالتصفح و بيهن خواص كلش هواي بعد صارت بالوقت الحاضر كلش ضرورية
أحمد: زين زين ..بس حتى أخر إصدار من الاكسبلورير (اللي هو الثامن) .. ما يدعم هذه الخواص اللي تقصدها؟
أنا: باوع.. الإصدار الثامن من متصفح الاكسبلورير، ممتاز و يدعم كل الخواص .. بس هو مشكلته ابطأ .. بس مقبول عموما أني مرة استخدم الاكسبلورير الثامن و مرة استخدم الفايرفوكس بالنسبة الي ما طول اثنينهن موجودات عندي
أحمد: يعني تقصد .. إذا انصب غير متصفح ..بعد ما ادوس على علامة الـ e الزركة ؟
أنا: اي طبعا ..راح تصير عنددك ايكونة جديدة للتصفح ، بس تبقى ايكونة الـإكسبلوريرموجودة و تكدر تستخدمه شوكت ما تحب
أحمد: زين هذني المتصفحات (الفايرفوكس و الكوكل كروم) هم من إنتاج مايكروسوفت ؟
أنا: طبعا لا .. هذني غير شركات ، مايكروسوفت بس أصدرت الإكسبلورير، بس منطيتك امكانية تستخدم غير متصفح على نظامك.
أحمد: اها ..لعد ماكو غير انصب واحد من هذني المتصفحات الجديدة .. بس كللي شلون ؟
أنا: باوع .. إذا تريد تنصب اخر اصدار من الفايرفوكس:
روح لهذا الموضوع و إذا تريد تنصب اخر اصدار من الـ كوكل كروم روح
لهذا الرابط
أحمد: كلش خوش .. بس إذا ما اريد استخدم هذني المتصفحات ؟ شأسوي ؟
أنا: لازم عل أقل تحدث لأخر إصدار عندك من الإكسبلورير، حاليا الاكسبلورير الثامن (8) هو المتوفر
روح لهذا الموضوع علمود تتعلم شلون تحدث
أحمد: ممتاز .. هواي معلومات ما جنت أعرفها ..بس هسة شلون اعالج المشاكل اللي بالمنتدى ؟
أنا: خلليها هسة ..نصب متصفح حديث أول شي .. و بعدين نتفاهم .. عل اكثر إذا حدثت .. بعد تختفي المشاكل اللي عندك
أمليت و لم تراجع لخلوها من الأخطاء الإملائية
تحياتي
رد مع اقتباس
المشاركة الأصلية كتبت بواسطة Daleen
