درر العراق

Legend of fall · 25/January/2015

Valge - ابيض

Must - اسود & وسخ ..... وتلفض ک Most

Neeger - اشارة للشخص الغير ابيض وهي مقاربة لكلمة Negro اﻷنكليزية

مشكلة اللغة اﻻستونية وخصوصا لﻻجانب تكمن في هذه الكلمات وخصوصا الثانية والثالثة ﻻنه ﻻ توجد غير هذي الكلمات للدﻻلة على الشخص اللي مو ابيض ( الحمدلله اني مشمول )... اغلب اﻻحيان الشخص اللي مو ابيض ويتم وصفة باحدى الكلمتين...فهي تعتبر اهانة.

اما موضوع الحﻻقة، فهنا ماكو حﻻقين ( بس حﻻقات )، ومستحيل ان تصدف مرة من المرات تكون الحﻻقة بيهة حظ، يعني، تشرح نص ساعة اريدة مدرج ومن هاي السوالف واذا بيه ينتهي ( مكرطف ) مثل كل مرة....

اول البارحة رحت احلق شعري...بما انه المدينة صغيرة فعدد محﻻت الحﻻقة قليل...كانوا 3 صالونات ، واحد تحول الى مطعم، وواحد دائما يخرب شعري، فرحت للصالون اللي مواصله نهائيا...فالحﻻقة من شفتهة ابتسمت وكلت لو تزين شعري بموس هم قبول...ﻻن ياجماعة حلوة...

فكالت استريح وهسة يجيك الدور ( مع العلم الصالون فارغ ) ، فنادتني الحلوة وكالت تفضل..اني ركضت ع الكرسي، واذا بيهة تكولي هسة تجيك الحﻻقة، وتجيني الحﻻقة ...يعني عجوز...ممتاكد اذا هسة على قيد الحياة او ﻻ....اول شي سوتة ام جمعة...مشت المكينة على شعري من فوك ( عبالك اريد اطبر ) ، بعد ماراح نص الشعر...كالت شلون تحب شعرك....اني دمعتي صارت بطرف عيني عبالك اسير تحت ايدهة ...كلتلهة باللي يعجبج...بس شوية مستعجل...المهم...صرت عبالك دافع دفتر ومتطوع للجيش وكاعد بمطار المثنى ومنتظر ياخذوني، فمن كملت كالت جملة بوقتهة حسيت اريد اضربهة كلة ، كالت ...او ترجمة ماكالتة...

انتة اول نكرو اشوفة وشعرة ناعم...
بلحظتهة عيني صارت على مكينة الحﻻقة وفكرت احلق شعرهة صفر واسويلهة سكسوكة...بس يرحلوني واطلع من جماعة فرنسا....

المهم...بناءا على المعطيات اللي مذكورة اببداية الموضوع...من الممكن ان تعتبر اللي كالتة مدح ...مو ؟