وحك روح الصدر نتعنه للميدان وندوس الدواعش لو تلاكينه
احنه اللبسانه السيد الاكفان ياثوب الشهاده ابدمنه شارينه
غيرتنه ولبو فاضل بقت عنوان والعباس ما هادت براكينه
ياجيش الولايه الحاربك خسران والينكر علي رافك شياطينه
احنه انصفيها
وروح محمد صادق احنه انصفيها
حسين الساعدي
ماتدري لهذاك الوكت حنيت
والبيت الشعر بالدمع حنيت
انه وظهري وبهليوم حنيت
وبهذا الزمن شفت الاذيه
االساعدي
اعرفك ما تجيني وقشمرت روحي
وكتلها الصبح محبوبي ويانه
طشت واهليه ونثرت اجروحي
ياروحي اشكثر بالجذبه فرحانه!
حسين الساعدي
هاي الروح اطحنيها يراحه
وهلبت كلبي تلملم يراحه
تعبان وضعت منج يراحه
وماظن نلتقي ابهاي الوطيه
الساعدي
ابوذيات اهداء لاهل الناصريه الطيبيين
حسين الساعدي
؛؛؛؛؛؛
ناصري أنه
نناصر دوم كلمن ناصرانه
ولليطلب الفزعه ناصر أنه
عراقي وللمدينه ناصري انه
وهويتي البلعراق الناصريه
أألساعدي
؛؛؛؛؛؛؛؛؛؛؛؛؛؛؛؛؛؛؛؛؛؛؛؛
شطره
سألته اعله المدينة إوكال شطره
وكتبلي شطر بس اشلون شَطره!
خله الكَلب بالنص صار شطره!
لمن كتب رايح مالي جيه
االساعدي
؛؛؛؛؛؛؛؛؛؛؛؛؛؛؛؛؛؛؛؛؛؛
تبقه الناصريه ناصريتي
ويروحي اشكثر منهم ناصريتي
ابصف قامات اهلها ناصي ريتي
الواحدهم علم واخذ تحيه
االساعدي
؛؛؛؛؛؛؛؛؛؛؛؛؛؛؛؛؛؛؛؛؛؛؛
الكلب كسلان جان وشطريته
جم شطر ابهواها وشطريته
وابن سوك الشيوخ وشطريته
لأن بلشطره روح الناصريه
حسين الساعدي
أبوذيات حسين الساعدي
ولا مات؟
::::
روحي اتعاتب ابحظي ولامات
وتتألم اشكد شافت ولامات
ابن مسئول مانسمع ولا مات!
بس عالفقره تفتر المنيه؟
ااالساعدي
===========
وجناس!!
حسين الساعدي
×××××
حسنك ملتهب بالدرب وج ناس
وداخت بيك ناس إشكثر وجناس
كتبنالك قوافي أشكال وجناس
وبعدنه امقصرين ابهل قضيه !
ااالساعدي
=============
أبوذيات حسين الساعدي
:::
هذا الطبع من جدي وعن باي
الحنين ايهزني للطيب وعن باي
أنه الفرهدوا سلتي وعنباي
وزين وخلوا اهدومي عليه
ااالساعدي
والماعنده غيره ايبوك الأشعار!
حسين الساعدي
؛؛؛؛؛؛؛؛؛؛؛؛؛؛؛؛
نكتب عالسريع ابهاي الأطوار
ولكلمن وفي وصاحي ضميره!
والماعنده غيره ايبوك الأشعار
ومايسوه العتب ماعنده غيره!
االساعدي
سلامي
لليقرأ كلامي
وتحياتي للكاعد ابصفناتي
ااالساعدي
مامشمول ابهاي المنحه!!
حسين الساعدي
:::::
واحد شاعر
مسئول ابدنيا المتوكحه
كام الشاعر
حته ايصورونه ابهل لمحه
كح الشاعر
صار التصفيك الهل كحه
كال الشاعر
مبروكين بأجمل فرحه؟
والما صفك
ما مشمول ابهاي المنحه!!
مامشمول ابهاي االمنحه!
الساعدي
روح ابروح جان اتبادلينه!
قصيده اهداء لوالدي المرحوم الحاج علي الساعدي رحمه الله
؛؛؛؛؛؛؛؛؛؛؛؛؛؛؛؛؛؛
شسولفلك يبوية وأبتدي امنين
وبيوم الرحت والحركه بينه
ياخيمة التلمنه و غَربت وين!
ومن بعدك يبويه اتشتتينه
يا فزعة النار اعله البساتين
هيج اخلافك احنه اتفرهدينه
ظَلم بيتنه وصرنه المساكين
وهموم الزمن فزعن علينه!
ياريت المنايا انبادل الزين
و روح ابروح جان اتبادلينه!!
رفعة راسنه وياشمعة العين
وهيبة بيتنه ابكل المدينه
يا روح التلم كل المحبيين
وأحنه ارواحنه ابكبرك نسينه!
تصاويرك يبويه اعله الحياطين
ويادار العفتها اشكد حزينه!
ومودع إبالله ابجاه ابو حسين
وبجنة الباري ابهل ضعينه
وبجنة الباري ابهل ضعينه
حسين ااالساعدي
رحم الله لمن قراء سورة الفاتحه المباركه لروح أبي ولامواتكم واموات المسلمين
