اجيت وريتني
ما جيت!
بقيت ابكلمة
الياريت!
لا شفت الشوارع ذيج!
لا ضحكات التمنيت!!
شفت الناس
تكره ناس!
والشوفه التشيب الراس!
بدموع اليتامه
ودمعتي اتلاكيت!
شفت العفه مفضوحه!
وشفت بغداد مجروحه
وشفت جيه وشفت روحه!
مو لله
الهذاك الصيت!!
شفت اهل الوفه والطيب
حارت بالدمع شتجيب!!
شفت الواوي صاير ذيب
والذيب الختل بالبيت!
واالمن جيت؟
ااالساعدي
هالنور ابوصاله
ماله لو لا!
صافي ويا جماله
ماله لو له
وبالمغرب خياله
ماله لو له؟
حارمنه الشمس وبهل مسيه!
ااالساعدي
لروعتك اجمل التحايا
دمعه وتريد اطيح صارلها يومين-خايف أذبها اليوم وتطيح العين
بس ما طبليت الياهو الجان!!
حسين الساعدي
:::::::
قبل لا تكتب الأشعار يفلان
اعرف وزن نفسك قبل الأوزان!
وإحساسك يحس بللي يعانون
والخالف ضميره اهوايه خسران!
والشاعر رسول ابوحيه مَجنون
إِومايعقل إذا ماصار !خَوان!
لا تنتظر صَفكه إمنليصفكون
فشله الصفكه والمابيها وِجدان!
والكاطع الهسه ابكبره مَدفون
واشعاره البقت ماطمهه دفان!
إكتب عالحياة إشما يريدون
وبطاري الفرح وتشوف الأحزان
حاول بالكتابة اتسر العيون
ياشاعر وَريدك تبقه عنوان
جَم ديوان لا صوره ولا لون
والومضه الجميله وتسوه ديوان
أنه أكتب شعر ويه اليكتبون
بس ما طبليت الياهو الجان!
وأكفر بالشعر واللي يصَفكون
إذا ماخَلوا الهل صفكه ميزان
إذا ماخَلوا الهل صفكه ميزان
االساعدي
صَفن ادموع الشريفه!!
حسين الساعدي
؛؛؛؛؛؛؛
ما أضيفه
هالمضيف الماقره الصفنات بوجوه اليضيفه
ما أضيفه
إولا أجر خطوه االمضيفه!
كَلبت كل السوالف
وأنه أكولن
مايخالف!
يا مضيف
الظم رغيفه
وصَفن ادموع الشريفه!
ما أضيفه!!
الدمعه من تصفن عجيبه
يعني موجوده
مصيبه!
وياعجيبه
الصفنت حته الدموع!
ويامصيبه
الضايعه ولمن تجوع!
تبقه وبعتبت مضيفك بين متوكحه وعفيفه!!
ما أضيفه
يافقير وكلشي عايف!
مايخالف
هيه مو كل المضايف
ماخذه اطباع الصرايف!
مايخالف
والمهم تعرف توالف
والصدك ويه السوالف!
لا تجامل ناس ضحكتها دغش ماهي نضيفه!
ما أضيفه
لا تجامل
والغراب اشوصله الصوت البلابل
لا تجامل
صفكة الشبعان عالفقره قنابل
لا تجامل
أحنه جوعانين بس نعرف نغازل!
وماتلوكنه السياسي
والشهيد ابلا وضيفه!
يا مأسي!!
الجوع قاسي
ولو يكون اسمه خليفه
راح أسب حته الخليفه
وما أضيفه
ااالساعدي
التعديل الأخير تم بواسطة ارجع يازمان ; 22/January/2015 الساعة 3:01 pm
وانه ابمايك اتوضه!!
حسين الساعدي
؛؛؛؛؛؛
ما ضلالي واهس بيك
وبغيرك صرت أرضه
ماأسئل حبيبي اشبيك!
تزعل ترضه ما ترضه
ماترجع لهفتي اعليك
وسابك كلبي بالركضه
زعلان و صحت لبيك
وبالِيزعلونك أتشضه!
شاعر والهوه ايناغيك
ومضاتي والك تفضه
ما أدري الغدر تاليك
وما تستاهل الومضه!
وبذاك الغله وشاريك
حسبالي ابربح احضه!
لكن والخساره ادريك
بيدك عمري يتكضه!
ويغارن وانه ابطاريك
إشكد حلوات معترضه
يا محبوبي و امسميك
وبدون البشر فضه!
وجان المستحه ايوافيك
وأنه ابمايك اتوضه!!!
هسه وماتكلي اشبيك
كلبك دايخ ابنبضه!
مجبور أبتعد ما جيك
لا هجرانك اتفرضه!
ماظن تقبل اتماشيك
عيني وبيدك امغمضه!
خاف احجايتي اتبجيك
البيني وبينك إنفضه
حضي الما تعدل بيك
يخايب كلمن وحضه
يخايب كلمن وحضه
ااالساعدي
وأنتَ العراق ابطوله!!
حسين الساعدي
؛؛؛؛؛؛
دله وعلم
غيره وعزم
بلحرب نلعب جوله
نخوه وكرم
واهل الشبم
أهل المكارم ذوله
جيش العراقي يابطل الله وشعب وياك
لا تسكت الدمعة طفل والبسمه تترجاك
؛؛؛؛؛
كَسر الصنم
يابو الهمم
راوينه منك صوله
ذوله الخدم
صارو زلم
تسكت فلا معقوله
هاي الحراير ياشهم كل الشرف بحماك
يابو الشجاعه والعزم والعفه تتنخاك
؛؛؛؛؛؛
اي والنعم
منك شهم
ماشي التريد اتكوله
بين الأمم
اسمك ضخم
وانته العراق ابطوله
بيك المراجل والقيم حيدر علي حياك
فُقاره وياكم هجم يخسه الذي عاداك
ااالساعدي
للمحكمه وطبيت وشماتي الشهود
والقاضي طلب ثار وكبالي موجود!
حسين الساعدي
هلا بلكاصد البيت السواعد!!
حسين الساعدي
؛؛؛؛؛؛؛؛؛
مدارس للكرم وأهل الدواويين
هذوله المحد اعليهم يزاود!
ومضايفهم سلف وتفرح العين
إوتدليك الدروب إولا تناشد
وسفرتهم تصايح لك هلاوين
هلا بلكاصد البيت السواعد
هلا بلكاصد البيت السواعد
ااالساعدي
مثل ما أذب القميص!!
حسين الساعدي
سَكتوك وصرت ضدي
والثمن كلش رَخيص!!
وصرت أخرس يا حسافه
شدوا ابحلكك قَفيص!!
بالعَكس أنتَ اخسرتني
ولبست ثوب النقيص!
راح أذبك من حياتي
مثل مااذب القَميص
مثل ما أذب القميص!!
اااالساعدي
-
زيدهن طَعنة وَداع!!
شفت بعيونك سوالف
جَنك امبدل الطباع !
دَحجي يالله اشبيك خايف
يالله غَير هالقناع!!
دَمعتك مو بلعواطف
يعني هالدمعه خداع
فِضحِتَك ضحكة شفايف
بالغدر كلش شجاع!
للزمن عاقد تَحالُف
ضدي جهد المُستطاع
يالله إبدي ابجرح نازف
ذكره منك للضياع!
بالظهر طَعنات شايف!
زيدهن طَعنة وَداع
وتعبت وليمته أشاكف
وِليه وبنص الضباع
جنت أظنك من توالف
تصمد الحد النخاع!!
وجنت أظننك مُضايف
تِشبع ابطون الجياع
العار ما طب للصرايف
والوفه البيهه شعاع
العار للباع المواقف
للأسف وبسرعه باع!
عوفني ولتكول أسف
روح صير الهُم دفاع!
المَركَب ابوجه العواصف
مااِله غير الشراع
وأنه بالكوات واكف!!
والشراع اوياك ضاع!
للأسف وياك ضاع!!
الساعدي
