-
عندما تحلين محل الشمس
وهيه سائرة الى الغروب
أرى في عينيك بحار! ورواسي
ومتاهات الدروب!
وتنبض قلوبنا بدعاء القلوب
اللهم غن كان حُب من احببت
ذنباً
فيا رب زدني بتلك الذنوب!
حسين الساعدي
-----------------------------------
هايه قصتنه يمريم!
صارت ابصدفه عجيبه
وبالاوهام
وبالخيالات
الغريبه!
وبالفعل احنه التقينه
وانتي صرتيلي الحبيبه
وابتدت قصة هوانا
شاعر وعاشك طبيبه!
هايه
قصتنه
يمريم!
والسنين اشكثر مليانه ليالي
وماغفت بيها العيون
امساهرين اويه الاماني
وجان يجمعنا الجنون!
مره
احسبج مثل بنتي!
ومره
اشوفج جنج امي
ومره
اشوفنج بعيده
ومره
أحسَنج ابدمي!
يا طفلتي البعمر كلش صغيره
ياعنيده وبالصبر جنج جبيره
انتي اول وحده احبها
ومن معزتها أكللها حقيره!
يا حقيره
الصارت ابكلبي أميره!
هاكثر نتشاقه جنه
وهاكثر فاركنه اهلنه
والسوالف ما أسولفها ابقصيده
خلها بالساني أسيره
يا حق----
وياليالي الجنه نسهرها سويه
لو انام انه اعله ايدج
لو تنامين اعله اديه!
هايه
قصتنه
يمريم
احنه احله اثنين جنه وشاهد اعلينه الكمر
احنه من جنه نسولف بالشعر نكطع مهر
احنه من جنه انتساجل كلها تكعد تنتظر
احنه عجبنه المنصه والشعر واهل الشعر
وصدك صارت ذكريات!
والجنون البينه مات!!
وصدك باجر يوم عرسج
غيري بأحضانج يبات
لا هله ابهاي الحياة!!!
وأنه
أول شايب اتحبه البنات!
وبالشعر راسم عرس
اتزاودن كلهن عليه
لان وياي الشمس
وانتي
يا عشتار بابل
من تكتبين ونغازل
ابسرعه نتحول بلابل
تصفن الدنيا علينه
وتسكت اصوات القنابل
جبنه قيس
وجبنه ليله
ابهايه قصتنه الجميله
وجانت الممكن بدينه
وهسه صارت مستحيله!
هايه
قصتنه يمريم!
واشكثر تدريني اجامل
واعرف الغيره ابجنونج
حب الاستطلاع عندي
زارع الدمعه إبعِيونج!
واحنه
ياما
اتزاعلينه
بالدرب هذا الطويل
والزعل
يبعد
علينه
ونرجع العشنه الجميل!
احنه
عشرتنه عمر جنها دقيقه
احنه
يمكن بالحلم ماكو حقيقه!
احنه حبنه
يبقه مسجون ابكلبنه
واهلج الرسموا دربنه
وكل محب يمشي ابطريقه!
ياحبيبه
الغازَلت بيها الضفيره
بالقصيده
ودوخت كل العشيره!
جنه نحلم
نضحك لاجمل روايه
وبس نسولف بالبدايه
ولو يمر طاري النهايه
بالدمع حيل انتألم!
هايه
قصتنه
يمريم
ياغريبه
اعيوني مشتاكه الرسمها
كلشي تعرف عني هيه
واني بس اعرف اسمها!
وانه
بظنوني الخطيه
الظلت اتودي وتجيب
منتظر من عدها كلمه
اهلي يردون الطبيب!
وما الك قسمه حبيبي
وكلشي بالقسمه ونصيب!
ويمكن
ايموت
الغرام
ولا سلام ولا كلام!
وحتى
كلمات
المحبه
اتصير بالدنيا حرام!!
هايه قصتنه يمريم