طبيت سوك السمج!
حسين الساعدي
::::::::
طبيت سوك السمج
والدنيا صارت ليل
بالذيل ضليت أشم
صاحوا ولك ياويل
بالراس لازم تشم
لو رايد التحليل!
كلتلهم اتأكدت
والراس خايس حيل
رايد اشوف العَفَن
خوما وصل للذيل؟
كالولي رد الهلك
ماتلكه ريحة هيل
هذا الشعب مبتلي
إومستنظر التبديل
هاي الحكومه شلع
والبرلمانِي ايشيل
والداعشي الما رحم
بينه وعلينه ايعيل!
كافي شبعنه جذب
يادنيه ماضل حيل
يادنيا ماضل حيل
ااالساعدي
عاذرك وادري ابضروفك
وابتعد ماريد أشوفك!!
لكن اتريد الحقيقه!
وداعتك مابيه أعوفك!
حسين الساعدي
ما طولك ولا تفكد فناجينك!
راح اتضَيع الدله
ابداربينك!
حسين الساعدي
ميمر السواعد!
حسين الساعدي
:::::
عالميمر اوعلميمر اوعلميمر
اسمع كلام الساعدي وتفَكر!
كلمن غدر بهواه
ما حبيته
لو بالوعد ينساه
ما حبيته
طبع الاخير اوياه
ما حبيته
عالن حرب وياي والله اليستر
ميمر ميمر
من تبتسملك دنيتك تتحذر
واسمع كلام الساعدي وتفَكر!
::::
درب الهوى كلش خَفي
دَليني
ما شفت كلبي المختفي
دليني
وين الكه بالدنيه وَفي
دليني
حته الملح بالناس شو ما غَزر!
ميمر ميمر
هالدنيه كلهه اتزول لا تتحصر
واسمع كلام الساعدي وتفَكر!
::::
لاكاني عين ابعين
ما حاجيته
ساركني من يومين
ما حاجيته
ماخذ دليلي وين
ما حاجيته
مابيه أصد لعيونه لمن تخزر
ميمر ميمر
يل بالهوى طَبيت لازم تخسر
واسمع كلام الساعدي وتفَكر!
ميمر
حسين الساعدي
ماظن يفرح الراسب والاكمال
شوف الكلب للونه ولك مال!!
الك قصرك ولك أمرك ولك مال
بس ما تمتلك روحي الأبيه!!
ااالساعدي
وجيوبك بقت ويه الدشاديش
حسين الساعدي
هاي الجنه عدها اجفوف ياناس
وجفوف امي جنه وحيل تنباس!
يا طيبة أهلنه
ياشمعة وطنه
ياأم المحنه التبض احساس
هاي الجنه عدها اجفوف ياناس
حسين الساعدي
بغداد وبغربتي عاشك معانيها
وبيا دموع القهراوصل وأعزيها!
بغداد صارت حلم
والحلم ماجاني
بعيوني ضلت رسم
والرسم أذاني
والغربه بيت الندم
والدمعه عنواني
والروح شافت الم
ياهو اليواسيها!
بغداد وبغربتي عاشك معانيها
وبيا دموع القهر اوصل وأعزيها!
حسين االساعدي
اويلي اشحاضن ابروحي سوالف
تعال احجيها الك كبل المنيه
تعال وردلي ضحكات الشفايف
واسولفلك جفاك اسوه بيه!
االساعدي
