شعر شعبي عراقي - الشيخ سعد الحسن - لا تقفل قفل
لا تقفل قفل و اتحسبه مامون
اذا ترهم عليه كومة مفاتيح
و لا تعاشر بشر و اتورجه باسرار
اذا ماي الحياء بگصته شحيح
و لا تتبع اثر بخدود الرمـــال
اذا چانت مطر و مسودنه الريح
و لا تعاتب نخل ما حمل عثوگ
خطية النخل بارگاب الفلاليح
و اذا مركب شله وحب ايد الگياش
مو صوچ البحر صوچ الملاليح
اذا شطك حطب و جروفه
نيران بعد تعتب عليمن عالسوابيح
اذا جنحك شمع والشمس تنخاك
مو فشله لو ان ابابها اتطيح
اذا كلك خشب و اتصيحك النار
شحالته الدم لو عالموقف يسيح
اذا بيت انهدم و اتساوا بالگاع
يرد احسن بناءه بشيش تسليح
لچن بيت الاخلاق شلون لو طاح
بعد لا سامح الله يصير تصليح؟
تعبنا الوكت..ضيم و بلا و عوز
وتهنه بين راي و بين تصريح
راي يگول صوموا..واجب الصوم
وهمه اتريگو بأسمن مفاطيح
و راي يگول..ذمه و باطل البوگ
وباگونه الظهر والوادم اتصيح
وراي يگول..وحدة وطن و تراب
وتالي شرحوه الوطن تشريح
واحد اخذ جدمه و واحد الايد
و واحد نهب فرحه و فرهد العيد
وواحد باگ گلبه وكل الاشواگ
حتى يموت عشگه والمواعيد
و واحد باگ حتى لسيين الموت
خرس موت الغباشي بلايا تغريد
و واحد صار حومه على الحمامات
ولا ظلت حمامه امطرزه الجيد
مو حگه لون يزهگ الفنجان؟
تتلگاه بالعسمه الاجاويد
و مو حگه لون يزعل البستان؟
حدر في الورد نصبو مصاييد
و مو حگه لون دردم الميدان
الاصايل گصرت والكدش بعيد
انگشط جلد الليالي و كزبر الراس
الاصايل گصرت والكدش بعيد
اصبر يا وطن لو طول الصوم
لا بد ما يجي يحب گصتك العيد
اهي شمرة عصا و نلگه الشمس غاد
ونبدل وجوهنا..وجوه المگاريد
غم عمري الگضه بصفنات التخوت
وگضه بوكفة سره أباب التجانيد
وگضه خيط يتبلبس بين خرزات
وكركوشة سبح بيد الشواديد
لا تعتب وطنه و تكثر اللوم
وحگ ديس الرضعته العتب ما يفيد
تگص ايد المجدي و ذبهه عالگاع
ترد تمتد مذله..المذله تعويد
رد مع اقتباس
المشاركة الأصلية كتبت بواسطة المشتآق
