بليل باهت حاط راسي اعله المخده
التمن بحضني سوالف ذكرياتي
وفجأة لن بيدي جكاره
منين اجت ياهو الشعلها
والمهم جتي بمحلها
طرت وي دخانها الذيج المحله
وذكرتني
جنه مجموعة شباب
من نمد جفوفنه نلوح السحاب
وحتى شارعنه الترابي جان يحلم
يجي يوم يزيح عن وجه التراب
نمشي بأطراف المحله
ونضحك بصدر الهوه ونشتمه كله
نفتح من الليل باب
نسافر الأبعد مسافه
ونحرك من العمر شمعه
ونكعد ابيناتنه نقسم الدمعه
العوز مابدل طبعنه
نجوع ونساعد ربعنه
حتى لو ماعدنه شي
جارنه المحتاج وديناله في
ولحظه لن كلنه افتركنه
ذاك حصله وظيفه اعله الرصيف
يبيع دفتر ذكرياته
يبيع لعابة خواته
يبيع ويبيع شكثر باع والمهم حصل رغيف
واشتره بيت وركن وأعلى البيوت
بكبر بيت العنكبوت
وذاك ماعنده صبر وارتكب غلطه
مانزل بآخر محطه
سافر بأحلام محد يشتريها
وسد وحشته بناس مايفهم حجيها
وأنه ضليت بحضن أجمل عروسه
لابسه سوار القوافي
إحساس عدها وكلب صافي
جنت ادلعها واصيحن ياقصيده
ادني يمي وشيلي همي
وارجع وياها طفل اضحك والعب
هيه هيجي
لو ردت أحلم تسولفلي الصبح أجمل احلامي
اطيعني وتسمع كلامي
وانتبهت لروحي لن انه بغرفتي
وحدي والحيطان تسله بغربتي
ابليل باهت
ولحكت آخر نفس ضل بالجكاره
واه يااجمل نفس خذته بحياتي
رجعالي سنين عمري وذكرياتي
وكلت ياروحي العزيزه النوب نامي
باجر احجيلج حلم باكه الحرامي
رد مع اقتباس
