أقر واعترف هزني جمالك حيل

من شفتك بهرني حسنك الفتان

حلو يل ماكو مثلك بالحسن شخصين

يوسف جان مثلك ونتبهلي جان

هسه انته جمالك انفرد بالناس

لوحة تعلكَت ئبعقل كل انسان

كل وحدة زليخة جننتهن بيك

من قاسن جمالك استحه الميزان

خليني أرد شبهك وانشر الأوصاف

بسطور الغزل يل وكت وصفك حان

يل عينك بحر غرّك اليسبح بيه

وطولك جن رمح لو مال غصن البان

اما ضحكتك تعزف موسيقى الراغ

تضحك وجنتك لوتعزفلنه الحان؟؟

الشفة رسم محبس بفص ياقوت

والليلو وراها سطريته اسنان

على كيفك ويانه من تطش الصوت

ماتحجي همس تهمس على الآذان

دايخ بيك كلي هل صرت محتار

هم انته بشر لو انته يسمر جان

لا انته ملك امنزل بأيات

وبعينك تلينه تدري جم قرآن!!

ماريد انه حسدك قل اعوذ نصيح

لو تمشي بطرفنه يبتلي الشيطان

اسم الله اعله طولك يابعد كل طول

يل ظلت حلاتك للوصف عنوان

ماكَول انه حبّك وعشكَك وهواك

بس وجهي من اشوفك كله ينطي الوان
الشاعره
لمياء العلي