قصيدة سر الخلود للشاعر المبدع سيف الحلفي .. تاملو مدى عمق كلمات القصيده
اشتهيت اشرب صبح راح احفر الليل ... لئن ما اريد ادنك راسي للبير
اشتهيت اشرب صبح راح احفر الليل ... بيه نكهة مذلة الماي بالبير
واطش بجروحي حنطه وازع اغصان ... حتئ تخيط اجروح العصافير
ولو كل دمعه ادم تنزل اركاض ... من اشم تفاح خدك بالتصاوير
ابدال رموشي نابت بالجفن ريش ... بحيث من اغمض نومتي تطير
طشيتك حقائق بارض الاوهام ... وسكيتك لاوعي وثمرلي تفكير
وعفت بيه جرح متعاند يطيب ... بحجم سر الخلود الابالساطير
ونقيضه ارواحنا في عالم الذر ... وتنافر بينهن والفارق جبير
اكو خشبة طرب بجفوف كاسور ... واكو خشبه يحجبوها ومنبر تصير
ابدل دمي لازم حتى انساك ... واجتث اسمك الاباورده يدير
جنت وياك ادنك راسي للغيم ... وجنت من دونك ارفع راسي للبير
ويوكف شعر ظلي وارجف بشوك ... مثل رجفت قلم وليم شكسبير
عسى شجرة نسبكم كلها للنار ... وتموت وحوبتي بذريتك تصير
نصحوني ودريت بشهوة الغيم ... براس الينخدع تمطر سواطير
وانا السديت اذني بخشبه عل الناس ... واجت ناس بحجيها تطك بسامير
جحا ياخذ مهرتي وانا لقمان ... ياكبوة غرامي وفرصة الغير
التجي مطيحه السرج والدم بالعنان ... بيا عين اليكع خيالها تغير
انا محمل حيايه وجتفي مزمار ... اون وحملي يركص عل المزامير
رسول الله اذا احجيله عل الصار ... اظن ميكول رفقا بالقوارير
انا لوما حكمتي وحبي لــ الله ... افرق بيك كل غيض الشواجير
واندلك واصيدك لو طرت فوك ... كما الاضواء تصطاد المشاهير
وتعرفني من اشد عصابتي بغيض ... من اخوزر عل السماء تطيح العصافير
بس قررت اعوفك بيد الايام ... وسامحني اذا ما اذكرك بخير
وانسى الي سمعته بهاي الابيات ... ولاتضن شاعر يبجي القوارير
وانا بتك جنح بس الله موجود ... بجناح القصايد باجر نطير
بــــــــجـــــناح الـــــــــقصايد بـــــــــــــاجر نـــــــــطـــير
رد مع اقتباس
