شعاتب والعمر ورگه بخريفك طاح ... تهز عمري وتطيح سنين من عمري ... ظلمه وخيط اسود وابره عد عميان ... ًعفتني بنصهم انزف زرفو چبدي ... ياسگف البنيته من الشمس لشتاي ... بحر تموز اجيتك شفتك مندي ... وشگلك من شفت ضعنك مشى بعيد ... المسيح من انصلب ماصرخ بگدي .... انا شايل جنازه ومن ابچي عذري وياي ... بچيت ارثي الشباب الراح من عندي ... وهذن دمعاتي سالن وي بياض العين ... حسبالك نوارس حطن بخدي ... وشسولفك علي خل يحچن الچفين ... عليچ الله بغيابه شصارلچ ردي ... بغيابك گمت البس محبسي بصبعين ... ونغم صوت الدمع يطرب اذن خدي ... صفنتي وخاطرك محد كسرها بيوم ... عكس گلبي وكلامك الانكسر عندي ... اصحاب الكهف طبولي مو للغار ... شبه انطي الكهف من اصفن بوحدي ... الك بظلوعي شهگة نص جسر مگطوع ... خمس سنين محد فوگه متعدي ... خفت يتبدى كاسي وشلته بيدي سنين ... ولگيت الكاس بيدي وعمري متبدي ... بكثر مشيي عله دربك طاح لون الگاع ... وشماته گبالي بس احلامنا بسدي ... ويمر بديار ليلي يقبل الحيطان ... انا اتحدى قيس الماوصل حدي ... وصلت لمرحله من اشتاگلك ابچي حروف ... من عيني وتطيح سوالف بخدي ... فراگك صار تقريبا سنه وجرحين ... واثر عطرك لهل الساعه بترس جلدي ... الدوه سمعه ثچيل وصوت جرحي بعيد ... وظباب ااذكريات يجيب ويودي ... من تهموك بيه وگلبي يوسف چان ... واكو شگ بقميصي وايدك بسدي ... فريت القميص البسته بالمگلوب ... خاطر مايصير من الدبر قدي ... وَيِـٍـٍٍّن تريد توصل ياجرح وياي ... اطخلك راس تحلم واخضع شحدي .. ما احتاج گصبه من اعزف عل الناي ... بيه احزان تطلع حتى بالبردي ... واكض غربيل اگلبه وانخل الدخان .. ويصفالي الهوه واشتمه من كدي ... وافوت بزود جرحي معاند اكبر سيف ... وانا بكيفي انتهي وبكيفي من ابدي ... يجرحني الزمن واستصغره بملگاي ... واستخطيه واگول زغير مو گدي ... التهده وماعثر بس يبقى خير الناس ... حتى الحگ بعد ما ابقى متهدي ....... للشاعر سيف الحلفي
رد مع اقتباس
