ازغار اعمارنه مو مال بالسوگ
وچبيره العيشه اكبر من صبانه
تاخد عالملامح اغلب الناس
موعن هذا انته وهذا انه
وعكسهم صرنه يمكن چي حماميل
اتعرفنه الناس گامت من گفانه
اذا حمال بينه اتمرض وطاح
تگلب جيبه ماتلگاله عانه
مقابل من تدور روس الامول
تلگه اچتاف النه بكل خزانه
من اتطيح سلعه ايگوم ابو المال
يتباوع علينه بكل خيانه
يحچي بدون ماتتحرك اشفاه
يمكن تطلع الچلمه من اذانه
اطلوگ العسرت بولادهه يهون
من يعسر اطلوگ الاهانه
بكثر مابينه واهس مدرسه انگوم
بنص السوگ وگفه بكل ميانه
نرسم مدرسه وحانوت وصفوف
ونخططهن بچف مستحانه
ونقنع ارواحنه بحله وتحاضير
اواحد يهمس الواحد بذانه
اگلك شوالفرصه تخلص بساع
استاذ حسين يمكن غيبانه
ونركض للصفوف بلايه رجلين
التعب گطعهن وظلن ورانه
من نلهث تعب نگطع هوه السوگ
تضيگ اجسامنه وتكبر ريانه
منهن مره ماندري الوكت فات
وتفاجئنه الشمس ماهي بسمانه
الليل اشگد شريف وعده وگفات
خذه الناس بظلامه وماخذانه
توصل بالتعاقب عدنه الاجيال
العوز يجيب ماكو منين اجانه
اخذ عباس اجانه من اربع اسنين
البگده بعدهم بالحضانه
چف يشيل بيهه اچياس الطحين
وچف تلعب دعابل من ورانه
الچبير اليگضي عمره احماله شيريد
الزغير اليجي يحافظ عالامانه
لهذا السبب توجد قاعده اتگول
كل حمال وسنينه وزمانه
اشما يعتگ ظهر حمال بالسوگ
يطلع ظهر حمال بمكانه
للانيق ضياء المياحي
رد مع اقتباس
المشاركة الأصلية كتبت بواسطة Dr.House
