وين نروح
وين نروح
ملينه من الوطن والنخل والشلال
وبقت قصه بصدرنه بس الم وجروح
رخص دم العراقي الجان ساس الكاع
وصفه بسعر التراب البلارض مطروح
الرمادي ادمرت وصارت وكر الاشباح
وبس الموت بيها بيده ضل يلوح
شيوخ اتناصلت من الشرف والدين
وايد بايد داعش والامر مفضوح
وين نروح
شكر مشتاك للمنصور ولبغداد
وبحضرت الكاظم ارد اكثر النوح
واكله شوف ولدك وانته ابو الوكغات
يمته نزوركم ويصبح امر مسموح
وين نروح
شدعي ع الاضراب الجانه منه الظيم
خلونه نتفارك واحنه روح بروح
جونه بطائفيه لا اصل لا دين
لامريكا وايران وبابها المفتوح
وين نروح
نضل سنة علي وشيعة عمر للموت
وتضل البصره بيتي والنجف بالروح
ويلمنه الوطن من الدوز حد الفاو
وتضل خوتنه مسج شما فركته يفوح
رد مع اقتباس