گول الك واهس تضل وياي
اذا ما الك واهس گول لا تخجل
ما اقبل احبك وانت ما مرتاح
وما ارتاح احبك وانت ما تقبل
اذا متشدني بيك وبيه اشدك حيل
انحل بالسهل من عندك وتنحل
بكيفك من اجيت وما جبرتك يوم
وما اجبرك بكيفك لو ردت ترحل
فكر باليهمك والمهم شتريد
انه كل اليهمني المهم لا تزعل
ما مليت منك اگدر ابقى وياك
بس المشكله خاف انه راح انمل
ميهمني الدرب صار امشي بيه سنين
ما اندل چنت بس هسه گمت اندل
ماگولن خساره الراح مني وياك
وي كلمن تحبه الروح ما تبخل
روحي الحبتك تتحمل بلياك
ما ينقص صبرها بغيبتك يكمل
مجنونه نعم بس تدري روحي شلون
تنجن بالعشگ وبلا عشگ تعقل
حبيتك صدگ والوكت چذبه هواي
بمعركة الدغش انه انزلت اعزل
تعرفني ولو عندك شكوك هواي
وانه ادري الشكوكك صار عندك حل
من شفتك سنابل روحي اجت ترويك
ماي ولا تظنهه لتصيرلك منجل
