ملاحظة :
" محتوى الموضوع مقتبس من منشور احد الاشخاص الذين يهتمون بالبرمجة ونظام الاندرويد خاصةً "
موضوع تقني بعنوان " الاندرويد والفايروسات ".
سؤال يطرح نفسه ( شنو افضل برنامج للحماية من الفيروسات علة الاندرويد ) ؟
بالبداية لازم تعرف انه اي تلفون يعمل بنظام اندرويد (ممعدل حتى يثبت امتدادات تطبيقات غير apk) مستحيل انه ينصاب بفايروس
تطبيقات الانتي فايروس عالاندرويد هي دعاية وكذبه ابتدعتها الشركات للتسويق لنفسها وصدقها 'الكثير'
تطبيقات الانتي فايروس عالاندرويد بيها فوائد مثل جدار الحماية (يخليك تكطع النت عن تطبيقات معينه) وليس انه تحمي جهازك من الفايروسات ! احتمال تنبهك اي ولكن ما تحميك وغالبا تنبيهاتها غبيه مثلها.
خل افهمك اكثر واقربلك الصورة :
كمثال بسيط نظام وندوز للحواسيب يتقبل تثبيت برامج باكثر من صيغة. من الممكن تكون exe وغيرها هواي صيغ وهذا سبب من اسباب اصابة الحواسيب بالفايروسات وبهاي الحالة اكيد راح تحتاج انتي فايروس حتى يحمي الحاسبة من البرامج الضارة مثل التروجانات وغيرها.
نظام اندرويد الاصلي يمكنه تثبيت تطبيقات امتدادها apk حصراً فقط لا غير (الة اذا تنصب محاكيات). ماكو شي اسمه فايروسات بالاندرويد. اكو شي اسمه برامج خبيثة الي هي ايضا تكون بصيغة apk فبالتالي انته الشخص المسؤول عن اصابة جهازك بالتطبيقات الخبيثة. مثلا انته نصبت تطبيق فلاني متعرف شنو وظيفته ولا تعرف المطور مالته وماعندك اي علم عنه. فاحتمال يكون خبيث ويتجسس على خصوصياتك ويسحب اسمائك وصورك وغيرها.
الخطوات الي لازم تتبعها حتى تتجنب التطبيقات الخبيثة هي انه من تريد تنصب تطبيق معين، اقرة شيريد صلاحيات (هواية يهملون هاي النقطة)، وأسأل نفسك هالسؤال (يا ترى لعبة فلانية او تطبيق فلاني معين شعنده بالاسماء او بالصور او غيرها) ولازم تراعي انه اكو مطورين اخطأوا بالصلاحيات وحطوها بشكل غير متقصد نتيجه لجهلهم بيها او اداوت البرمجة اليستخدموها او غير ضروف
لذلك من المستحسن اذا تريد تنصب تطبيق معين شوف صلاحياته + المطور مالته.
بالنسبة لي استخدمت نظام اندرويد من 2011 بالاس 2 اول مرة ولحد هاي اللحظة شكد نصبت تطبيقات ماعرف شنو هي من باب الفضول ولا صارت عندي مشكلة خصوصية ولا تجسس ولا غيرها. لذلك خذ راحتك لان نظام اندرويد نظام آمن.
منقول ..
رد مع اقتباس