السلام عليكم ....
حياة الغربة فيها منغصات كثيرة , والامور التي تفرحنا عبارة عن 3 اشياء قليلة , سلامة الاهل والاصدقاء في العراق , والشئ الذي نصنعه بأيادينا وتجعلنا في لحظة فخر بالنفس ( كالنجاح في العمل , او امتحان اللغة ..او او او ) وكل هذه الامور تحتاج توفيق الله سبحانه وتعالى , والفرحة الثالثة هي الفرحة التي يكتبها لنا الله وما اجملها من فرحة ..تاتي في لحظة واثرها يستمر عمرا كاملا ....
تعبت من الفـ(ـووووو)صحة ...نعود الى لهجتنا ....
في اول شهر وصولي لأستونيا , عملت كمتطوع في مدرسة معوقين , وكان الـCLIENT مالتي طفل مصاب بمرض التوحد اسمه RIKARD ( ريكارد ) .. جسمه اصغر بكثير من عمره , ذكي جدا , مشاكس واغلب الاحيان انا من يدفع ثمن مشاكستة الفطرية , خلال فترة اربع سنوات مع ريكارد , بدأ يتكلم كأنسان عادي بعدما كان ميكدر يتكلم كلمة وحدة , واول كلمة اني سمعتهة من ريكارد ...لما درت اطلع ادخن جكارة برة وهو كان يريد كلاص ماي ...صاح اكثر من مرة ماسمعتة , الى ان سمعتة صاح بصوت عالي ( بابا ) , وهاي هي هدية رب العالمين اللي تترك فرحة لا توصف يستمر اثرها لفترة طويلة , بعد ان تركت العمل ( لأسباب كلش هواي) بذلت جهدي ان يكون مع ريكارد الشخص اللي اكدر أأمن عليه عندة ..
هذا ريكادر ( واللي بصفة مو منغولي ) هذا اني والله ...بس تم التشويش حفاظا على ذوق الاعضاء الكرام ...
اني صارلي بالعراق 13 شهر ...وكل يوم يمر اشتياقي للولد يزيد , البارحة اجاني تلفون من استونيا ,واذا بيه من معهد المعوقين , ومعلمة ريكارد كالت البارحة اكو البوم صور خاص لريكارد يشوفة يومية بعد الدوام حتى يبقى على تواصل فكري ويتذكر اهله ومحبيه , اللي صورهم بالالبوم , وصورتي من ضمن الصور ...فأشر على صورتي وكال اريده , فالمعلمة جاوبتة بأنه اني بالعراق وميكدر يتكلم وياي الا باللغة العربية , فتحت برنامج حروف عربية على اليوتيوب وبيه موسيقي حتى يلتهي ...تكول لكيت ريكادر كاتب الاحرف العربية بالطريقة اللي موجودة بالصورة حتى يكدر يتواصل معي ...
بالمناسبة ريكارد عمرة الان 13 سنة ...التقيت بيه اول مرة بعام 2007 من كان عمره 6 سنوات ...
رد مع اقتباس
المشاركة الأصلية كتبت بواسطة الاء المدريدية
