باجر لو تشوفيني ...يزينب ما تعرفيني
يودعها تهل عينه و ايقلها الأمر حتمي
هسه قاعد إقبالج باجر عالأرض مرمي
لو شفتيني عالغبره زينب لا تجي يمي
امطبر بالحجر راسي شيبي امخضب ابدمي
إذا باجر تلاقيني ... يزينب ما تعرفيني
باجر آه يا زينب و كل الآه من باجر
وجهي هذا وجه الله يبقه اعله الأرض عافر
لو شفتيني بالمصرع دلالج يظل حاير
كل أوصالي تتوزع بين السيف و الحافر
إذا مقطوعه جفيني ...يزينب ما تعرفيني
بالميدان يا زينب باجر ينخسف بدري
إذا ودج تقبليني هسه قبلي نحري
أنشدج يا اختي حاجيني سؤال ايرواح ابفكري
شتسوين إذا شفتي الشمر قاعد على صدري
تجي و لمن تنظريني ...يزينب ما تعرفيني
باجر لو وقع جسمي و الأسياف وذرنه
راسي اعله الرمح يبقه أظن عندج خبر عنه
إذا يمي الجسد جيتي تاخذ قلبج الونه
اشلون اتعرفي أوصافي و الطعنه عله الطعنه
إذا جيتي تحاجيني ...يزينب ما تعرفيني
أودعج و الوعد وياج يصير ابساحة المصرع
إذا رد المهر خالي ينوح و يهمل المدمع
تعالي و لا تجيبي اوياج سكنه خوفي تتلوع
شيصبرها لو شافت أبوها اعله الثره اموزع
إذا ودج تواسيني ...يزينب ما تعرفيني
رد مع اقتباس
