هنا

[حمود سطو]

مو كلمن يودك يعني يهواك


مو كلمن يودك يعني يهواك
ولا كلمن شراك اتبيعه نفسك
هاي الدنيه بيهة اشكال وارناك
يصح كريب منك ينسى اسمك
ويصح ابعيد الك كل يوم يشتاك
ويمر اليوم كلة بطاري ذكرك
اذا انته غشيم بصحبة الناس
مو ياهو اليجي وتفتحلة كلبك
واذا كلبك فرشته بعطر الورود
يصح كريب منك حيل يسحك
واذا جرحك طفح لاتطلب العون
عوفة الوحدة خي يمل هوه يلزك
ولتكلي الصديق يضمد اجروح
اذا جرحك لحمته بايدة ينشك
وما اكلك كل صديق بهالاوصاف
اكو بيهم اذا كحيت يشهك
واكو بيهم مصالح يقسي وياك
ولكن بالزمن يذكر خبزتك
واكو بيهم وفي ومرافكك دوم
ولكن ينتضر غفله ويدجك
ولا تحزن اعلى الراح بزمان
خل اليوم الك ضمضم حسرتك
ولتكلي صديقك بيك مزروع
لان بيوم هم تصفر زرعتك
ولتكلي سكيته بدم الاحزان
لان يوم اليخضر ينسى ثمرك
ومو هذا الغريب بهيج موضوع
ولكن هالعجيبه الينسه جرحك
يصح مجروح انته وتنزف دموم
يباوعلك عدل لكن ينكرك
وياريت اعلى هذا الحال وتهون
يطبك وي عدوه يصير ضدك
وانته اشلون جاوبني بهالاوضاع
هل معقوله هذا يصير حصتك
كلت انا العَلي وانته افهم الباقي
ولكن بالوصل لاتنسه نفسك

[حمود سطو]

رسمتك وردة بعيوني
وبقيت اخط بصورتك والجغن يرعد

... ولزكت صورتك على كتابي
ضلت الصفحات تتكلب وعليك ترد

مرات اصفن وابقه افكر بيك
وتشوفني امي تكلي ماما اكعد

والبحر ضايج ماتجيهه امواج
والهوى واكف والماي يركد

سفينه ويه سفينهه عليك يتنافسون
منو الي يشيلك وصار الحجي جد

حتى الاشجار صارت منك تميل
وتتساقط الاوراق وعليك تفقد

والحجارة تريد تفوت جوه رجليك
حتى تدوس عليهه وشويه تسعد

وصارت حالة تناقظ بين الحطب والنار
ومن شافتك النار ركعتلك وبدت تخمد


وحتى البزازين كامت منك تهاب
وصارت من تشوفك بسرعة تشرد

والبلابل والعصافير بس تعاين عليك
وتطك روحهه بجمالك وللسمه تصعد

وحتى النجمة صارت بيك تنقاس
وعين بعين تضل بلمعتك تحسد

الطالب من يشوفك ينسه دروسه
ويضل يفكر بخيالك وباله يشرد

والطفل يترك الممه وينسه امه وياك
ويضل يبجي عليك ولحضنك يرد


والشمس ماتقبل تضوي على بابي
وكل ماافتحه البابي تكلي لك سد

البنات من شافتك كلهن بيك أتجنن
ومحد يعرف يحجي كلهه تمسلت

والشباب تتعارك عليك وتريد وياك
وكلهه تجيب كراسي وبصفك تكعد

حاولت انام واغمظ عيني وارتاح
ماقبلت تغمظ وتكلي لك شتسد


انه احلف من فركه ماأنامه الليل
ومااكدر ارتاح اذا مو يمه أمدد

وكل ماحاولت أنسه خيالك بيوم
تتلاحكك روحي ويجيبني الود

وأقرالك قصص واحجيلك اشعار
وابقه الليل كله براسك اسرد

واضل اتخيلك مثل العسل وجهك
يضحك عليه العسل ويكلي زبد

ويتركني كلبي مايقبل بعد يدك
وتزاعلني الشرايين وحتى الكبد

تملكك بس الملوك والملك لله
واني صرت جوه أيدك مثل العبد

كلما يجيني طيفك أمشي وراه
وكلما اقترب منك الكاك تبعد

انته تاخذ حياتي وما أسألك ليش
عود أني المسيطر وصايرلك اسد

طلب واحد اطلبه واتمنى تقبل بي
اذا طخت بعقلك بوسه وحده للخد

[حمود سطو]

شمس شخصك شهــــــــب شعشع شمايـــــــــــــــل..
شبه شامه شمع شايل شمايــــــل..
شمل منكم شجافيكم شمايـــــــــل..
شعـــــوفنكم شمايلكم شجيــــــــــه..
.................................................

شهــــد شمام شريت شكر شفتــك..
شهد شلزم شهوفن شكض شفتـك..
شهد شاهد شهدلي بيوم شفتـــك..
سلبت الـــــروح وتركت النار بيـــــــــه..

...............................................

أريد أرسل سلامي بجنـــــح مارف....
وكلبي من هـــــــلال العيــــد مارف....
أريـــد ابجــي عليك بكثـــــــر مارف....
جناح الطيــــر وأنسام الهــــــــــوى....

...............................................

.................................................. ........

كلبــي مافــــــرح عكبك ولا سار ..
وجدمي ماخطى لغيــرك ولاسار ..
أخبــرك مابقت كلمـه ولا ســـــر ..
فضحني الشوك والحب موبديــه ..

.................................................. ....

ترف مرني بطريقك وأنت راجع ..
أنعيـــــد أيام حبنا ونتراجــــــع ..
ليش أنا أتقــدم أنت راجــــــع ..
رجع ضميرك بلكي يحن عليه