هذا اوليدي
لابس حلقته بچفه
ومحضره البخور
وبدلة الزفه
مامعزوم
يمه شجابه عزرائيل..!!
يملك الموت
عينك من صدگ صلفه
خذت اوليدي
مني وماگلتلك ليش
ولا كتلك دخيلك
خذته بالصدفه
ما سامع قصيده
وبيها صحت اااالله..!!
مالاحك دفو
ولا بردت الشفه..!!
ماتذكر شطر
صفگله (گاظم) بيه..؟
من صاحوا
اعد ماجاستك رجفه..؟
بس المحترگ يفهم حجي الدخان
يملك الموت هاي البيه ثلج يدفه
اشعبالك يطيح
اوليدي لو مريت
اعرفه اعناد
شايل حته وي حتفه
افاااااا...
ماعاش
اليگول اوليدي امس دفنوه
ولا جرف الصخر
ماهدلت چتفه
اعرف اشلون احط الروح بالتابوت
لا تقنعني هاي انكتبت ب صدفه
يدري بگبره
واگف منتظر عباس..
ومحضره
الهلاهل زينب اتزفه..
يملك الموت
تلزم ورده وتحاجيه
آنه اوليدي
يهوى السالفه الترفه
يحلفونه
ب علي چان ويگلهم اي..!!
من اتريد روحه اب حيدر اتحلفه
لــ محمد القزاز
,,
رد مع اقتباس
