تغيرتي
تغيرتي
زهت بعيونچ الدنيه وتغيرتي
وحله بعينچ رسم غيري .....اولاگلتي
وربيتي بين حسراتي... وتدللتي
وخفت اعليچ من روحي ... اولا خفتي
وتكبرتي
نمى بجنحچ نسل چذاب يفلانه وتكبرتي
ومشيتي بدرب اليشمتون مارفلچ گلب ساعه وتلفتي
ولاهمچ كلام الناس وبمشيچ تعثرتي
وسهرت اشگد سهرت اعليچ وانتي بلا گلب نمتي
ونسيتي ولا تذكرتي
نسيتي الچان مثل الطير لو مسچ برد تحميچ جنحانه
ونسيتي الچان مثل الليل ياما لملمچ بذراعه واحضانه
ونسيتي الباع حفنه سنين من عمره ورجع بجدام خجلانه
وصبره ولا صبر مجنون قاسي ويا سجانه
تعب لجلچ تعب فلاح خانت بيه گيعانه
لملم كل عذاب الكون بيده وشال شكبانه
ورد بچفوف تعبانه
حسافه اللي تعبنه وياه ينسانه
ربه بفينه وخشن عوده وتگوه وظيم جازانه
هظيمه اللي نشد جرحه يسد بابه اويه ملگانه
ومر مثل الغريب بلا خجل يمنه وتعدانه
وبعد شنگول يفلانه
اذا ظيع حچينه وياچ ميزانه
يالطبعچ طبع عصفور ينكر كل تعب لو شاف جنحانه
ويالحچيچ حچي الدلال اكثر من كلامه يصير حلفانه
واگول النوب هذا انه
البنيت اعليچ وسط الروح زنزانه
وطلعتي وخنجرچ لليوم ظل مطبوع نيشانه
وهذيچ انتي الذليله اللي بنص تموز بردانه
ويرد يعقوب لاحزانه
ارد اسحگ گلب تعبان تسري النار بكتاره
ارد بروح كلهه جروح كلهه هموم تتباره
ارد خجلان مثل العاش عمره يطمطم بعاره
ودليلي الچان يحلم بيچ يغفه ويحلم بثاره
ينام ويصحى تالي الليل ناره توگد بناره
وشجاهه الروح محتاره ؟؟
الرخيص يظل رخيص شما غلت بالسوگ اسعاره
ويظل طبع الرخيص هواي تجاره
والخاين يظل منبوذ من اهله ويظل مكروه من جاره
وباچر لاندم ينفع ولا دمعات تتجاره
وكلمن يكشف اسراره
ونگعد نكشف المستور واسلط عالظلام النور
واحط بيدچ عذاب وجور
واشوفچ جرحچ المسموم واثاره
واشوفچ حرگة المغدور لو يتخاطف اعله العين غداره
واسولفلچ عذاب سنين چنه غيوم مطاره
عذاب يبچي حتى الچان قاسي وگلبه احجاره
وهلبت بالدمع شاره
هلبت ذكرى مرت بيچ مره وبيه فكرتي
لچن تبقين ذيچ انتي
التعبت شگد اعدل بيچ عوجه وما تعدلتي
وتغيرتي
وزهت بعيونچ الدنيا وتغيرتي
وحله بعينچ رسم غيري اولا گلتي
ت . غ . ي . ر . ت . ي
م
رد مع اقتباس
