عله مهلك يليلي...أودّع خليلي
تمر بالثواني...رماح بدليلي
حبيب و حبيبه ...وداع و مصيبه
رماح بدليلي
عله مهلك يليلي بالله لا تقصر
فجر باجر يليلي خله يتأخر
نريد إنشوف باجر نسلك ابيا بر
عله انحور الهواشم تنظر الخدر
دموع و نياحه ...بعد ما كو راحه
اليودع حبيبه ...يظل وي جراحه
منيته قريبه ...وداع و مصيبه
رماح بدليلي
يليلي كل خيمنه اليوم مر بيها
كل وحده تون لوداع واليها
إبدي امن الرباب إسمع نواعيها
طفل عطشان عدها و ينظر اعليها
يليلي إنظر إلها ...دموعك تهلها
إذا ما ترّوه ... اشيسكت طفلها
تره جف حليبه ...وداع و مصيبه
رماح بدليلي
تعال و شوف رمله و اسمع الونه
حلمها امن العمر بس جفها يتحنّه
تعب ذيج السنين اشحصلت منه
و اسيوف العده باجر يقطعنه
يمحبوبي باجر ...تزفك عساكر
تطفي شموعك ...رماح و بواتر
جفوفك خضيبه ...وداع و مصيبه
رماح بدليلي
يليلي إنظر وداع الأكبر و ليله
دشوف اوداعهم و امعاتب الليله
تظل ساعه تعاتب ساعه تشكيله
تصيح و مره تسكت مره تحجيله
سهرت الليالي ...حملت الجرالي
حسبت المشيبي ...توافي يغالي
ليالي العصيبه ...وداع و مصيبه
رماح بدليلي
يليل العاشر بممشاي تابعني
و شوف اشلون أبو فاضل يودعني
أريد أنحب إقباله و خله يسمعني
و أحلفه بدم أبونه لا يضيعني
إهو الدق لي صدره ...أبد ما أعذره
بوعوده و كلامه ...يليلي أذكره
أصّبح غريبه ...وداع و مصيبه
رماح بدليلي
أريد أوصل كفيلي و أنتحب يمه
أعرفنه غيور و يحترق دمه
أقله إشلون من يطيح أبو اليمه
عله زينب تشوف الناس ملتمه
يراعي الحميه ...أروحن سبيه
يضربوني خويه ...و أشاقف بيديه
أسيره و سليبه ...وداع و مصيبه
رماح بدليلي
بعد لحسين خلي انروح يا ليلي
تصيح اوياي أريدك لو صحت ويلي
ها يحسين إجيتك إقعد احجيلي
أريد أبجي اعله صدرك و انت تبجيلي
أبويه الفقدته ...بعدهي جمرته
جنت من أذكره ...تصبرني انته
تغيب المغيبه ...وداع و مصيبه
رماح بدليلي
يبت أمي العزيزه لا تأذيني
لا تعذبين قلبي البيه يكفيني
أوصيج ابوصيتي خويه سمعيني
إذا جن ليل باجر ما تشوفيني
عدوي اعله صدري ...يحز سيفه نحري
مهم عندي خدرج ...يزينب اصبري
مصابج عجيبه ...وداع و مصيبه
رماح بدليلي
رد مع اقتباس
