هنا

[الشاعر سيد كاظم الشرع]

آه يازينب
آه يارينب يبنت الأكرمــــــــــــــين
شلون حالج من رجع مهرالحُسين
يصهل ويجري الدمع
ينادي الحسين أنصرع
والشمر حز النحر والودجين
آه يازينب يبنت ألأكـــرمين
======
شلون حالج من رجع ليج المُهــــر
يسحب عنانه ودمـــــــع عينه يخر
يصيح طاح حسين على الغبره وذر
لون حاضر والله عبـــــــــاس الكمر
جان مــا جسرت علوج ألمُجرمين
آه يا زبنب يبنت ألأكــــــــــرمين
=====
شلون حالج يبت حمّاي الحـمه
من لفاج الغوج مخضوب بدمه
أدري فكرج راح لمج فــاطمه
ذكرتي بالتأكيد ذيج المضــلمه
تذكريتي البــاب وسقاط الجنين
آه يا زينب يبنت ألأكــــــرمين
=====
عفه صبرج زينب الموقف حرج
حين شفتي المُهرمكلوب السرج
خالي من حسين أبوالتسعه الحُجج
أضن فكــــــــــرج راح للكوفه ولج
أذكرتي كـوفان وغدر والد حســـين
آه يا زينب يبنت ألأكـــــــــرمين
=======
شلون حالج زينب بهاي المحن
حين شفتي المُهريسحب بالرسن
أدري فكرج راح يم جبد الحسن
ذكرتي سَم المجتبى وذيج الفتن
أتذكريتي النعش وسهام اللعين
آه يا زبنب يبنت ألأكـــــرمين
======
شلون حالج يبت حمّاي الدخيل
حين رد المهر يصهل بالـــعويل
خالي من حسين بس غمد الصقيل
بالخيم مـــــا ضل زلم غير العليل
والكفيل مكطع اليــسره ويمـين
آه يا زينب يبنت ألأكـرمين
=========
عفه كلبج زينب شحامل قهر
من نزلتي وشفتي بعيونج شمر
فوك صدرحسين ويحـــــز النحر
أدري فكرج راح يم فارس مُضر
صحتي وينك يـا أمير المؤمنين
آه يا زينب يبنت ألأكــــرمين
=====
شلون حالج يخت عباس الكمر
من غفت عين الكفيل على النهر
وهجم للصـيـــــوان بنذاله عمر
أحرك خيامج وفرهد للخــــــــدر
عكب أبو فاضل بكيـتي بلا مُعين
آه يازينب يبنت ألأكــرمين
========
آه يا زيـــنب يبت عقد الوله
شلون حالج مـن لفاكم حرمله
وقيدوّا زين العـِــــباد بسلسله
وجابوا أعجاف الهزل للــــعايله
ياهوّ ألركب بـنات المرسلـــين
آه يا زبنب يبنت ألأكـرمين
======
شلون حالج من حده حادي الظعن
وعفت أبوالسجاد عاري بلاجفن
تزوره عُسلان الفله تنوح وتون
والهواشم عالصـــــعيد بلا دفن
وانت رحت ميـسره ويا الفاسقين
آه يازينب يبنت ألأكرمـــــــــين
=====
أقسم برب العرش والمعــــــــتقد
من الصبر مخلوقه يا بنت ألأسد
جزه صبر أيوب صبرج ماله حد
ياهوّ مثلج يصــــبر بهاي الشدد
ونعم من صبـرج يبت طه ألأمين
آه يا زينب يبنت الأكرمـــــين
أشلون حالج من رجع مُهر الحُسين
====
خادم الحسين
سيد كاظم الشرع

[علي الشمري]

كالعادة إبداع رائع

وطرح يستحق المتابعة

شكراً لك

بإنتظار الجديد القادم
دمت بكل خير

[Archi]

شكرا للمجهود ...ينقل الى قسم القصائد والصوتيات