ثغب حته الرعيد بجيتك عاشور
ثغب حته الرعيد بجيتك عاشور
وظل يحرك بروحه ويلطم بعبره
وذب ضيه الكمر وهدومه صارت سود
واذا تنظر ابراسه تشوف اثر طبره
سوده الدنيا صارت والغضب ملحوظ
والغيمة بسمانه تحولت حمره
مختنگه البشر والدنيا جنها كبور
وملائكة العرش والناس متحسره
ياهو تصدله عيني تشوف بس ينوح
وكل الناس تنعه وجوههم صفره
او مو بس البشر عدهم عزا يلطمون
الدنيا اتجودرت من حزنت الزهرة
حسين اسمك فقط لو اذكره كلبي يلوج
شلون اهده بمصابك دمعي ماهدره
والمايبجي على قصتك هذا مو انسان
وماشايل كلب ثق وأعتقد صخره
لاحاشه الصخر وشدخله بالموضوع
هم سوت عزاء ولطمت الصخرة
حبك ياحسين ابكل كلب مغروس
ومجنن عقول العالم باسره
جم سنين مرت محت كل الصار
بس انت البقيت ابكل كلب ذكره
ما ينساك مؤمن صادق الايمان
ولينسه المصاب شلون ما كفره
كبل عاشور تلكه احبابك ايلوجون
مترقبه لمصابك كلها متحضرة
هذا اللطم صدره وهذا حنه الراس
وهذا البلسلاسل هم يدك ظهره
حقهم ما نعاتب كلشي خي سوون
المخبلة العشگ مرخوص ونعذره
وميهمنه ابد تهديد هذا وذاك
عود الغو الشعائر!؟ ونسو العترة!؟
لا والكفل زينب لا وداح الباب
تجدد الذكرى شما تمر فتره
منعوف الطريق البي هدى الرحمن
واذا يلزم نضحي انضحي وبكثره
هذا الحبك انت من الزغر هاويك
عنده اسهل امر لو سلمك عمره
اليحب لجل اليحب يخسر اهواي اشياء
بس عنده المهم محبوبه ميخسره
وماضل شي قليل الثورة الزوار
ومن هاي القضيه انوصل الفكره
والرايد يفجر عادي فجر الناس
من تفجره انت اتسهل بأمره
كبل هوه عدل لو زار رد للبيت
وهسه الروح تبقه هناك بالحضرة
منتظر الراشدي
رد مع اقتباس
