1
العشق .. العشق
العشق في الظاهر
إثنين في هيام ووسامة
العشق .. زي التلفاز
ألوان ونظام بولي سيستيم
راح تبقى نظام بولي عاشق
وفي قلبكياما ها تكتم
العشق
العشق .. ده .. حالة
يا نميها .. يا نغميها
:
بيقولوا
في العشق .. ها تعيش .. العز
عز . !!!!
ده في عز الظهر نجوم ها تشوفها
بيقولوا
في العشق .. ها تذوق الشهد
شهد !!!
لو عايز الجَد ويا الشهد مرار
وفصول
في فصول السنة ها تذوقها
:
نصيحة
خُدها نصيحة مني يا غالي
الحب والعشق … في الزمن الحالي
زمن القُصة .. وسوسو ولالي
زمن المخفي .. والمسيار والعرفي
واقع بيقول
العاشق .. إنسان .. حالم .. مسطول
انسان دايخ .. زي .. الداير في سواقي
يا جاري
يا جاري . في . العشق
كلف خاطرك .. واطلع سطحك
ها تلاقي سلوك وسلوك .. ها تلاقي سلكك مشبوك
في هوائي .. وهوائي العشق .. بيبث الحب الطياري
:
العشق ….. إنت وحظك
ده حكاية وتوته توته
يا تموت في القلب
يا نكملها .. ونرقصها بزغروطة
العشق
في الواقع دوامة
دهاليز .. الغاز .. وارقام
وسيناريو
بحلاوته .. ووحاشته
راح تغرق فيها
لو كنت أبو هيف العوام
العشق
ده أكبر مول .. ومحلاته كتيرة
فيه الحب .. وفيه النار والغيرة
فيه الرعشة
وفيه الدمعة .. لما بتيجي السيرة
وزي ما فيه الورد .. فيه الشـوك أكوم
ووصال .. وخصام .. وعتاب ومــلام
قالو العشق
أحلام .. ووعود وكلام
لو .. تتحقق
أحكام .. مأذون وشهود وأختام
فيا خالي من عشقك نام واصحى
وادرس ابعاده تمام
سيبك
سيبك من الشهد
سيبك مـ الشهد والتسبيلة والتنهيدة
قدامك خطوة جديدة
اعشق .. اعشق بتأني
خَليك جوة الجرة . واتأكد ميلون مرة
مـ الابيض والاسود والوردي والبمبي
واحسم ردك .. أحسم ردك
حواء مش سهلة .. أه من حواء
أه من حواء
(2)
أه من حواء
حواء دي معادلة
شقة .. وشبكة .. وزفة ..ودبكة
وربطة في خِلفَــة تقولك واء
ها ينسوك اسم ابوك .. والعيشة ها تهدك
ها تكمل .. ولا ها تهرب أنت وجلدك
ها تكمل ….. ؟؟
أوكي
طب .. أوعاك
تتخدر .. لما تسبل بعيونها
وأوعاك
مكياجها يبحلقلك .. لما تغير لونها
وأوعاك
القشطة فوق الركبة .. أو تغريك بعطورها
وأوعاك تندب .. بخطوة
خطوة .. لو دبت من غير تفكير
رحت وتهت في مشوارها
يا عاشق
حواء طلباتها فرمان
تعرق .. تغرق .. تُولَع
اسمع .. نَفِذ .. وابسطها
حواء .. دي معادلة
خفتها .. حيويتها .. وراحتها
في الغالب .. بتوازي صِيغتها
صَيغ . صَيغ يا ابن الناس
هات ..هات
هات الاصفر هات الابيض .. هات الماس
هات لبن العصفور .. وتعالى بجيب مليان
ها تلاقي البسمة
ها تلقي الشوق بيزيد .. والدنيا بترخ حنان
حواء .. أه من حواء
(3)
حواء .. أه من حواء
لو قصرت . وتأخرت
أو طنشت إشارة بصباعها
عالرابع
راح تقلب غول .. غول .. في طباعها
تقعد لك عا الوحدة .. وتشوفك مـ الراجل نُص
وجنابك متشنكل على واحدة ونص
تتنطط .. تترقص .. ها تشقلب حالك
ويا ويلك .. لو .. مش .. عاجبك
أو منك … تنهيدة .. أوف .. بتسمعها
أو يغلط وشك يوم
ويفوت تكشيرة .. بعين تلمحها
لو أخرس .. غمض عينك لا تتهور
ًمكن نظرة شكوى تخونك
وتشوفها الهانم .. وتصور
وتصور اللي ها يجرى لك
لما عينك في الظلمة تنور
وساعتها نصيحة
خُد نَفَسَك .. لملم حالك .. الحق نَفسَك
أطوي الغيظ .. لقمة وابلعها
مشي أمورك واحفظ دورك
إمشي اتمخطر. زوج مش أكتر
فوت دايماً يا غلبان .. وارسم بسمة جنتلمان
رسم البسمة مسألة صعبة .. ؟
لا مـش صعبة .. طقطق ودنك يا حباب
عدي وفوت من أطخن باب
ارفع حاجب غمض عينك
شد شفايفك عالجناب
راح يظهر صفين اسنان زي البنور
ها تروق
وها تحلى في عيونها الصورة
ها تظنك .. ندمان .. ووديع وِسبور
ليلة ورا ليلة تلف تدور … أسد العاشق بقى عصفور
وادي حواء .. مهما تثور
إجباري .. في حبابي عنيك
ادفع يلا حِل الكيس .. ما تماطل لا تولع فيك
شفت العاشق يا غندور يا ولهان
حواء
يا تحق رغَبَاتها
يا مصيرك مستشفى جنان
رد مع اقتباس