أنا عاشق جمال البحر
عشقته
ياناس من صــغــــــري
فتني بموجه من بدري
مين قـدك ... يابحر .. مين قـدك ؟
من الصبـح .... حتى التماسي
الناس .. ساكنه على شطـــــك
مليون مظلة وشماسي .. طَالة .. ملونه برك
الناس .. يا بحر
فرحانة بخدودك شبعانة من جُودَك
بتدعي لك ...... يطول مـَـدّك
مين قــــدك يا بحر .... مين قــــدك
يمين تلاتة ... بشتاقــلك
باشتاقلك في بعدي .... واشتاقلك وأنا حَدّك
إن غبت عنك يومين
يتمطو ......... في حسابي ســــــنين
حنين ..... يا بحر ..... حنين
ودايمة صُورتك ..... عايمة في العين
والله على صُوتَك
صوتك يا بحر أنغام
على صوتك
بطوي جفونـي وأنــــام
جتني من يومين .... في منام
سألتك
ليه يا بحــــــر .. ليه .. محني ظهــرك ؟
ليــــه رايـــح في جزرك
حزين مقهــور واخـــد على خاطـرك ؟
البحر قالي
الناس يا صاحبي
وقـت ما تعوزني .. بتجـــري
وفي صــدري تحكــي وتشكــي
ناس ... بتغسل همومها
وناس ... بترمي سمومها
تُدوسني ... وتفُوتني
يا صاحبي
تعبت رياحي ..... في كل النواحي
شمالي جنوبي ... شرقي وغربي
بوصلــة الحب .. تاهت يا صاحبي
من ناس .... بتنخر في عرضي
وناس يا صاحبي .. بتقل راحتـي
ناس ... عايمـــة في دموعــــــي
وناس
نهاشة في حدودي .. هباشة في كنوزي
بتعري في ضلوعي .. بِتحفُر لي قبري
الناس
يا بحر لاهيانة ... غفلانة
أمانة يا بحر أمانة
حَلِفتَك ... ما تشيل من بالك
الناس ... يا بحر معذورة
شايفينَك ... بنظرة مبتورة
شايفينَك بحر بحر عادي
ولا فاهمة مودَك .. ولا لون عيونَك
يوم ما تبكي موج .. أنينهُ رمادي
ولا فاهمة هياجك
ولا سامعة . في حضن الريح
صرخة جراحك ... لما تنادي
ليه يا بحر ليه
ليه مسافر .. مكسور المشاعـر
قريك يا بحـــــــر قريك
أنا حاسس بيك .. وشاعــــر
جُودَك ... وموجَك
ربوني عاشق خلوني شاعر
لسان الحب ....... لكنتي
على صفحتَك
حروف عشقي بتنطقني
طمعـان يا بحر ..... تسمعني
أنا جايلك .... في توب اعترافي
جايلك .... من الكـدب حافي
فارد شـراع صدقي
راكب ...مراكـب شكوتي
وأنا شاعر
شاعر .. يا بحر شاعــر
والشعر ..... كلمتي
شاعر يا بحر . شاعر
شاعر .... رغـم محبتي
شاعر ..... إني بخونك
وجايلك يا بحر جايلك
جايلك اطفي ظنونك
:
أنا يا بحر عاشق
عاشق في موجَك .... موجة صبية
موجة على صدرك .. عايمة وسبية
ســــــألــت المينا عنوانـها
سألت الشـط عن كونـها
قالولي ... حدودك بر
مالك . . ومال
موجة في ملك البحر
سامحني
سامحني..... يا بحر
في موجتك .. سـحر
في عيونها . سافرت ودوبت
وعلى لونها . نمت وتوهت
شفت في حلــمي أطيافـــها
وعومت سنين في أوصافها
حبيتني .. وحبيتها
وتاهت عني ... ولاقيتها
وأهي ساكنة
أهي ساكنة هنا في بحرك
على أمرَك .. أمورة و مأمورة
وانا ساكن .... على شطك
وقلبي ليها ...... معمورة
:
يا بحر
يا بحر الدنيا ......... والعجب
على موجَك .. حظي انكتب
أنا عاشق في موجك
موجة صبية
في قربها .... طوق النجاة
رد مع اقتباس