السلام عليكم <<وعليكم السلام
شلونكم<< بخيــر
يارب دوم بخيــر
طبعا اليوم صدكَـ تبهذلت وتعبت بسبب الانترنيت الاكَشــر
الصبح كَعدت ب (7) حتى اتحضر واروح للدوام ب (8)
المهم بدلت ملابسي وتريكَت ورحت ادور البايسكل حتى اروح بي للدوام
صدكَ يطلع فاش التاير !
طلعت واخذته وياي لأبو البايسكلات حتى انفخة
المهم نفختة ومشيت بالطريق جاي امشي واحد هم صاعد ع بايسكل يمشي كَدامي ( امامي )
نمشي سوى وجان يجي واحد بسيارة ازوزة اجتاز السيارة الكّدامة والشارع تبليط بدون مجاري و(المي) واصل لسابع جار
و جان ينكعنة بالمي انترست هدومنة (مي) خطية الولد كاشخ وشايل بيدة باكيت جـبير
يمكن هدية يريد يهديهه لشخص عزيز عليةوكعت بنص المي وتنكعت
وهو الولد طاح من البايسكل من الخوف .. اني طلعت كَبل بوجهي ما اهتميت لأن مار بهيج مواقف
فجأة اباوع ع ملابسي عيب اروح للدائرة هيج منكَعه ملابسي والوقت ميسمح شلون شلون شلون
وجان ارجع للبيت مثل الـطلقة امشي سريع ومامهتم للملابس حتى اذا تنكعن من جديد لأن راح ابدلهن
وجان ابدلهن واطلع جديد بالباكيت ومرتاح امشي ع كيــــــــــــــــــــف
وجان اوصل للدائرة لكَيتهم لازمين ماسحات ويطلعون بالميٌ
كَالولي هلا وين جنت منتظريك اصعد سوي النانو(الانترنيت) واكعة من المطر والهوى مال البارحة
حميت بسرعة لأن ماكو درج اصعد بي والصعدة والنزلة تموت تعال اتشلبة الحايط ويمكن توكَع وتنكسر رجلي
استغفرت الرحمن وصعدت اسوي بقيت ربع ساعة يلا كملته لأن البرج جبير وثكَيل وانوب وحدي محد صعد وياي
نزلت اشوف الانترنيت اشتغل و جان يطلع ماكو
المدير كَالي علي اصعد سوي من جديد (المدير كلشي ميفتهم بالانترنيت)
كَتلة ابو احمد الصوج بالواير مكَطع مايقتنع يكّولي شلون طالعه اشارة صفرة اذا مكَطوع الواير !
كَتلة راح اصعد بس مابيهه داعي صعدتي بس تعب ابلاش ..غلس ماكَال شي
صعدت من جديد رتبته
المهم ما اطول السالفة عليكم ..
صعدت 5 مرات بسبب المدير الفهيمةعصبت حيل
ونفس الشي ماكو نت
كَتلة ماكو غير حل ..! كَالي شنو ..كَتلة اشتري ( نانو) جديد هذا عطل ..
خابر ابو المنظومة نفسة دزلنا صحن جديد
رتبته وصعدت من جديد سويته
اريد واحد يفتهم يتابع الاشارة ماكو !! اعدادات النانو شوية معقدة ويعرفوهه اصحاب الخبرة هنا
واصعد وانزل 3 مرات يلا طلعت اشارة قوية
وجان يشتغل الانترنيت كنكو كلهم والنت صار اسرع من قبل بهوااي
ساعة وكلهم راحو بقينا انا والمدير كَالي يلا نروح
رحت للبايسكل طلع فاش من جديد بنجر..الساعه ب 2 الظهر ماكو محلات مفتحة
رجعت مشي للبيت وصلت ب 2 ونص
تعبان كلللش دخلت للبيت تلكَتني امي مبتسمة
طبعا بهذا اليوم اكتشفت اشياء ماكنت اعرفها ابد !
اول شي كل هذا التعب بالدائرة ومحد كَالي شكرا لأن تعبت اليوم وتركوني اخر واحد بالدائرة !
وثاني شي ابتسامة الام ماكو مثلها بالعالم كلة.. بلحظة وحدة نستني كل الصار وياي
(إبتسامة أمي لوحدها شى يستحق الحياة ) مقولة حلوة ما اعرف منو كاتبها ..
وثالث شي الصبر ما اجمل الصبر ...
وبعد هواي شغلات خليتها بداخلي لعلكم تعرفونها لو تخيلتم انفسكم بمكاني
طبعا اعرف راح يصير عدكم ملل من القراءة وتحسوون بيهه مبالغة ! لكن هذه الحقيقة والله
بس تحملوني ولحد يعيب ع (وجان نجي وجان نمشي وجان نروح ) هههههه
اخوكم الصغير
تحياتي
رد مع اقتباس
المشاركة الأصلية كتبت بواسطة محمد ألعبادي
ربي يديم امك ويحفظه ويحفظ كول الامهات