هنا

[abas satar]

نَاقُوس ٱلْڭْرَّابْ


مَنْ بِيرْ ٱلْحَكْمَه سْڭِيتْ ڭَرْبَه ،بَٱلنَّاقُوسْ نْصِيحْ يَا عَطْشَانْ


لْقِيتْ ٱلنَّاسْ فْ ٱلظَّلْ رْوَاتْ سْفَاهَه وُٱلْعْقَلْ مْخَدَّرْ سَكْرَانْ


هَبْ رِيحْ ٱلنَّزْوَه بَعْصَاةُ سَرَّجْ ، سَاڭْ وَ رْكَبْ شَلَّى قُومَانْ


هَاذَ عَنْدُ ٱلنَّشْوَه فَ ٱلْكَاسْ ذَاكْ بْلَاتُ عَشْبَه يَزْفَرْهَا دُخَّانْ


شِي بْثُوبْ ٱلرْذِيلَة ٱلْفْسَادْ عْلِيه رْكَبْ عَلْفُ ٱللَّذَة بْإِدْمَانْ


وَ للِّي غْوَاهْ ٱلْمَالْ دْخَلْ لَسْوَاقْ بَٱلدْلَالَة يِتْنَابَحْ مْعَرِّي نِيبَانْ


يِڭُولْ بَٱلْحَظْ تَغْنِيتْ بْحُبْ ٱلدَنْيَا مَشْطُونْ سَارْحْ هَيْمَانْ


بَٱلْبَدْخْ يَسْرَفْ لَزْيَادِة يَزْحَفْ يَتْرَبَّص ٱلْفْرِيسَة بْسَمْ ثَعْبَانْ


صَارْ ضْعِيفْ آلجَّهْدْ وَسْطْ أَهْلُ غْرِيبْ يْعَانِي مَنْهُمْ نَسْيَانْ


مَحْكُومْ بَٱلْحَاجَة وَ ٱلْفَقْرْ يَحْيَا نْهَارُ بَٱلشْقَا لِيلُ بِٱلْهَمْ سَهْرانْ


هَاجْ عْلِينَا بْحَرْ ٱلْهَمْ وَ عْلَاتْ مْوَاجُ فْطَيْهَا غْرَقْ ٱلْإِنْسَانْ


عْصَفْ بِيهْ لَدْزِيرَة مَفْقُودَة نْسَى ذَاتُ مَا عَادْ لِيهْ عُنْوَانْ


مَابْقَاتْ فِيهْ غِيرْ ٱلسَمْيَة وَ ٱلْمَظْهَرْ لْبَسْ بَٱلنِّفَاقْ شَلَّى لْوَانْ


وَلَّى ٱلشَّاهَدْ يَكْسِي لْغَاهْ كْذُوبْ يَبْدَعْ صْيَاغْةُ زُورْ وُ بُهْثَانْ


بَٱلْڭَرْبَة فُوقْ ٱلْكْتَفْ بْقِيتْ بِينْهُمْ دَالْحْ وَ ٱلْڭَلْبْ حَيْرَانْ


مَنْ عَرْڭِي زْفَارْتْ ٱلْڭَرْبَة مْلَاحْ مَاهَا تْعَكَّرْ ڭَطْرَانْ


فَ رْمَلْ ٱلصَّمْتْ فْرَغْتُ طْفَا حْرُوفْ صَدْرِي كَانُونْهَا مَنْ زْمَانْ


مَنْ حْمُومْ رْمَادْهَا كْتَبْ ٱلْڭَرَّابْ مُوَّالْ بَكْلًامْ صَادَقْ يَا غِيوانْ


وُ عَادْ بَحْرُوفْ مَنْ دْمُوعْ يَرْوِي وَ يَسْقِي ذَاكْ ٱلْعَطْشَانْ

[mary ali]

nice