على كَد العطش سالفتي ويه الماي
على كَد العطش سالفتي ويه الماي
النهر مو مال عشره وسالفه وملكَه
وعلى سجة سفر جم كَلب تلكَه هناك
من جوى القطار ايطيح ويسحكَه
الميتحمل جرح لا يحب دربه اسهام
ويطب ابزود صدره وما يحط دركَه
من شبكَة اوداعك خذت خيط امراد
ولهسه اثار صدرك ع الزند شبكَه
انه الكَيت اليدفي احظاني وكت اليل
ونت اتضل عمر بارد ولا تلكَه
شسويلك شكَلك كَلي حتى ارضيك
اجيك ابيا طريقه وحتى تتلكَه
النخل لو ما يعزب ما تمره الناس
ولا تصعد العثكَه اتطلبه وتدكَه
التمر جي بعده اخظر ما تصدكَه الناس
يحركَ روحه يالله الوادم اتصدكَه
بحياتي اشكَد بقى وتبنيلي امل تعبان
بصدر شفاف ماس اشعندك اتعلكَه
اكبر فاجعه ايصير الكَلب تنور
تترسه اشكَد خبز وتجره من حلكَه
سبب واحد اكو للخيمه من اتميل
مو مال العمد بس مايل الدكَه
رغم ماكو هوى وتطير من اتطيح
ماكَلك حمامه انكَلبت الوركَه
بس عشت العمر بثنينهن مكتول
التهده الحياة المكَبره اتخنكَه
ولا عاتب بعد ليصير دف اوياي
وما راهن عليهم من تجي الشهكَه
اجفوفي العود خوه ايعيشن ابفد بيت
ما يوم التقن بس ساعة الصفكَه
الفركَه المن صدكَ كون البعده اتموت
غير ام وأبن ما تنحسب فركَه
م
رد مع اقتباس
