درر العراق

¥محبوب$القلوب¥ · 14/October/2014

يادهري ** ليش تفجع گلبي بغـياب الأحبه
يادهري ** ليش يوميه شخص منهم تغـَيبه
الـغالي ماخلـيته
ومسـلم اتعنيـته
-----------------------
حسـين أنــه يادهــر بـَسك مـأسي
ليـش گاصد مـني تاخـذ اغلى ناسي
اشعندك انـته اوياي شو ويايه قاسي
مــني ماخــذ مسـلم ولـَيه تـواسي
يادهري ** تعبتني ابغـيبة احبابي الغوالي
يادهري ** وسـهرتني يامــه أيـام وليالي
والجفـن بچــيته
ومسـلم اتعنيـته
-----------------------
يادهـر ويــاي مــاتنـصح جـبـتها
والله كــل احـباب گلبــي غيبـتها
گـلت بلكـي اطباعك انــته غـيرتها
الكوفه ضـد مسلم اشوفك حشدتها
يادهري ** مانصحت اويـاي مـره وحـده انـته
يادهري ** حتى ابن عمي وسفيري شو أخذته
اشگد محن راويته
ومسـلم اتعـنيـته
-----------------------
يـادهـر مـن واعدتني اذكــر أنه
عاهـدتني وگلـت ماخـون الأمانه
وبقـضيـة مسـلم اثبـت الخــيانه
انـته متـرصـد ومــتقـصد أذانـه
يادهري ** اوياي وعدك ماوفيته وربي شاهد
يادهري ** انچـان ماتگـدر تــوافي لاتــواعد
حسين ما واَفيته
ومسـلم اتعنيـته
-----------------------
شحچي لطفاله يدهري من يسألون
اشلون اگـلهم راح ويَــه المايردون
صعبه اقـَنع اطفال والدهـم يريدون
ولو اجت ليه حمـيده وتجري العيون
يادهري ** اشراح اجاوب انه للطفله حميده
يادهري ** مـن تگـلي منـك الوالــد اريده
بيـدمـن خـليـته
ومسـلم اتعنيـته
-----------------------
ابــد مــاعـندك امــروه آه يدهــري
مـنك اتحــمل عـذاب وهــذا قــدري
اكسرت ظهري ومن يجَبر بالله كسري
الراحـه مـنك ماشفتها ابطـول عـمري
يادهري ** شلون صورة مسلم اتفارگ خيالي
يادهري ** ماتـفارگ ناظـري طــول الـليالي
والسهر خـاويته
ومسـلم اتعنيـته
-----------------------
حـساب لَـيه يادهر شـو ماحسـبته
مـن ابـن عمي الشهم مسلم غدرته
مستحَـه مـاعـندك اولا خجـل انـته
انـه ابو الـيمه ودليـلي بـي جرحته
يادهري ** منك اشكم طعنه انه اتحملتها
يادهري ** والاخـير ابگلبـي انته ركزتها
گلبي والله أذيته
ومسـلم اتعنيـته
-----------------------
يـادهـر مــن الأحـبهم بالله كـافي
حسين من احبابه شو خليـته صافي
آلا هـل مـن ناصـر اتـردد هتافي
يلـي طبعك ابــد ماتعـرف تـوافي
يادهري ** باچر ابطف الحزن تنهـي حياتي
يادهري ** حتى ترتاح انته من يبدي مماتي
الردته اظن سويته
ومسـلم اتــعنيـته
-----------------------
تمت بحمد الله