مجموعة اشعار وابوذيات كلش حلوة
انا بگاروك حبك وانته هزني .. صرت فرصه بحياتك وانتهزني .. انه شجره محبتك وانته هزني .. وخلي الورد يتناثر عليه
يحلو الاطباع واصلني وقارب .. ماعندي اهل غيرك وقارب.. سفينه بالبحر ردتك وقارب.. تشيل الحمل من يثگل عليه
عليك الروح تجذبني واردهه .. لان كلبي نبع صافي وردهه .. شلون تغيب وانته اسمك وردهه .. واردلك بالشعر غصبن عليه
لساني كبالك ياحلو لك لك .. جم مرة اكلك لاتكول لك لك .. اليه انته ماتصير الغيري لك لك .. ليش اتبيع مالاتي عليه
عساهه بكلب دنيانه وكلبين .. اريد الهه جسم صاحي وكلبين .. اشو الحلوات شافني وكلبن .. يجوز من الكبر بين عليه
كلبي صار بسمك يعني مالك .. وشنهو اللي بقالك عندي مالك .. عشت بقصر حبك وانته مالك .. ورضيت بجورك وضلمك عليه
گعدت اروي المدامع اني راوي .. ما اعرف الكتابه وصرت راوي .. حبيت المحله وديرت الراوي .. شجاكم اليوم ما سألتم عليه
اجه طيفك بعز نومي وعاني .. انا بهجرك ياخوي امرض وعاني .. احبك لانك انباري وعاني .. ابن عمي وتضل غالي عليه
احط لكليبي اجناحات ويروح .. الك يحمل رسايل عتب ويروح .. صفن وسط الجسد روحين وي روح .. تعيش العمر يا مدلل سوية
كضيت العمر بس ادرس وطالب .. شيفيد اللعب بس اركض واطالب .. صرت تلميذعندي وطالب .. ومن اريد اسئل شايل خشمك عليه
حبيبي لابس المحبس وساعة .. وقميصة ياخلك ما بي وساعة .. ساعة ينام المدلل وساعة يفز مرعوب ريته بين اديه
مرة اصفن عليكم مرة سايل .. مرة الدمع ناشف مرة سايل .. مرة احتار شكتب من رسايل .. مرة انتظر ساعات المنية
أصد وازعل وادير العين طبعان .. لجن لجمات إلك بالقلب طبعان .. حلو بكلشي لكن بيك طبعان .. تـشك وتغار بيها عليه
نفس ونريد شمـك ياهوانا .. العمر ذله ابغيابك ياهوانا .. أتيه الروح يمــك ياهوانا .. خيالك مرهم ودلاها عليه
أبد مازلزلك حالي وهدك .. عفاه اشيحمل الكلفه وهدك .. قصدي بس اصيدنك وهدك .. واريد اتصير حر وترد إليه
حياتي عكب شخصك شلي بيها .. وجميع اعضاي صارت شلل بيها .. توديلي رسايل شلي بيها .. اريدن شوفتك والكعدة سوية
انا صياد وصادتني شبكتك .. حالم بيك جن بستك وشبكتك ..ادك عليك ليش مشغولة شبكتك .. انه الممنون اذا ترمش علية
مشيت وشوكم عتني وردني .. مسحت الدمع بجفوني وردني .. اذا مكتوب من عدكم وردني .. مثل ميت ترد الروح بيه
سن سيفة الدهر بحشاي سنتين .. واضن باقي من المشوار سنتين .. اخبرك من رصيدي بقن سنتين .. اذا عندك رصيد دك علية
هجرك ياولف صاير بلا حد .. مثل سيف الي يكص ركبة بلا حد .. كلتلي انتظر اني ارجع بالاحد .. اجة الاحد يمتة تعود الية
كلبي ياوطن حبك والك راد .. ومل من كثرة فراكك والك راد .. احب الشيعة والسنة والاكراد .. وحبك ياوطن واجب علية
اشتخسر لو فد ساعة تمرنة .. انشربك جاي ونوكلك تمرنة .. خدم نوكف لون انتة تمرنة .. ونخدمك يابو ذات الوفية
خلص عمري بالتوسل وداري .. وانا العالم بحالتكم وداري .. ضعت وتيهت ولفي وداري .. وبقت نفسي يويلي تلوم بية
صديقك لو يهدك لا تهدة .. وعن عينك عدوك لا تهدة .. لا تزعل بسرعة لك لا- تهدة .. الجرح صح بيك بس الالم بية
شكثر تانيت نصري مايه نصري .. ولا مرة على زرعي مايه نصري .. اذا انته تحبك مايه نصري .. انه تحبني اليسا تموت بيه
غرامك ياحلو بنص ليل هيفا .. وليلي الشاف طولك طول هيفا .. اصاله اتخبلت وتغارهيفا .. من اليسا وماجده الرومي عليه
حبيبي اليوم ما بين ومايه .. وبهجرة نشف دم الكلب ومايه .. جبتله نانسي واصاله ومايه .. طلعت هيفا تدور عليه
علّي ما يرف گلبك ولاحن .. سهامك صوبن گلبي ولاحن .. نجمات الظهر بانن ولاحن .. تروح او تجي وكت المسية
عليه سهام صدر الترف شرعن .. وسفن حبك بخليج القلب شرعن .. اريد مذهب يحل البوس شرعاً .. واذا ماكو ارد للجاهليه
عساني ماعشت لحظة بلاهم .. بلوني الناس ريت الله بلاهم .. سعيد العاش بالدنيا بلا هم .. وانه همومي كثرن شلون بيه
جنيت اهموم حبك منت جاني .. ويمر طيفك عليه منت جاني .. صرت كاتب ومخرج ومنتج اني .. اعد افلام ضيم المر عليه
وكعت وصحت انة الك اخ اخ .. تأذيت وبجيت هواي اخ اخ .. حسافة تعوفني يا خوي اخ اخ .. اذا بأول مصية نكتت بية
الك حن الگلب يسمر الك مال .. وذاب الگلب من هجرك والك مال .. ولاني ناجح بحبك ولااكمال .. ولاراسب واگلك حيل بيه
حديقة بعلم رب الكون ظليت .. وعلى درب العلم ياناس ظليت .. شجرة وبس على العاوين ظليت .. وصرت سايق مخدة وجودلية
الك ياصاح ماظل مني خاطر .. واحسبه احساب دربك من اخاطر .. تعال كرب حبيبي مني خاطر .. تعرف اجنون حبك اسوه بيه
ردت طيفك يلوح بيوم مالح .. وطعم فركاك صار هواي مالح .. بعد مادز رساله وابد مالح .. لان كلما ادز مترد علية
اتعارك ياحلو لجلك وأطك طك .. وللحساد اذب حرمل وأطك طك .. افرح من تراسلني وأطك طك .. وأطك أصبع بس اسأل علية
احبة وما احب واحد بدالة .. ويا ذنب البدة مني وبدالة الك منصوبة بكلبي بدالة ..خطك على النبض يشتغل بية
ندوخ احنة بدونك يا هوانه .. ومن مااشوفك مااعرف ياهو انه .. گوگل اصيرن الك وياهو انه .. دبليو دوت وتدخل عليه
اشكثر يا عراق سافرنه ومشينه .. وليالي طوال بفراكك كضينه .. كل الكون شفناه بس مثلك وطن لا ما لكينه
__________________
رد مع اقتباس
