غير ويطفه لون الليل
والف وسبعميّة لون راحن للوطن فدوه...
غير ويستحي دجلة ويرد الدين
داينّاه زلم تسوه...
أول مره اشوفن عرس مابيه باب
واول مره اشوف طيور تنزَف للعرس گوّه...
أيا حرگة مواقفنه...
أول مره اشوف نجوم مچتوفه اعله راگ الماي
بس ثار الفشگ غرگت سوالفنه...
بعدنه نعيش عالفطره
وبعدهه قصورهم تذبح صرايفنه...
بعدنه نصدگ بكلشي
ولالذنه بدمعنه الحار
تتلگه الغرب تضحك مضايفنه...
ها لولاد يالكتّالكم من عدكم وبيكم
ها لولاد ماصح بالوطن جنّاز يتكفّل باساميكم؟
اذا نفرض شحيحة الناس
چا دجلة شعجب ماهزته الغيرة ويوصّلكم لاهاليكم!!
ياهو الگال مچتوفين!
گالولي عراقيين مكتوبة بجناسيكم...
شباب سنينكم توهن
عمت عينه الرصاص شگال من خرّب معانيكم؟
مالازم جسد منّه..الولد لوبس عَلَم ينشم
ماندري يجي المامور جايب صوغة التابوت وشويّة حرورة دم....
ولو ردنه گبر منّه
گبر نلتم عليه بالعيد نفرشله سوالفنه واهوّه يفرزن شبيهه
يلتمن خواته عليه
يحوطنّه بدمع وشموع
وأمّه توگّف الهوسات من تثگل بواچيهه...
شيطفي الجمر بيهه؟؟
ولاتبرد سوالف أم لحگهه الموت لاخر ضحكة بالعنگود
حطّت نشِد عد الماي
بلكي ايعَرْف ابنهه البايگه البارود...
تتوضه بنعاويهه وتصليلة صلاة الشوگ
مرّه تفرّع الشيبات..مرّه تشد علك باسمه...
المضيعة ولد كلما يحط عصفور تتلگاه
تگوم بلاوعيهه وتعثر بچلمة.....
چندوب الشعر ينكتب للدخّان؟
مامش صوت بي ريحة قصيدة مدثرة بنسمة!
هاياوطن يابو النار!
حار بحار بيك الموت ماتتعطل القسمة!
گبل چانت الگمره ابين كل سنتين مره تموت
هسه شلون مامعلوم!
يومية السَلَف بيه تحترگ نجمة
رد مع اقتباس
