هنا

[¥محبوب$القلوب¥]

في الهاشميين و الأنصار

1. قوم يا حيدر يحامي ادخيلها

دارت اعلى ابنك زلمها او خيلها

2. خيل عد خيل او زلم عند الزلم

سربه عد سربه او حزم عند الحزم

3. بالطف اولها اتنخت شام الهجم

أعلامها امصوله ابجهدها او حيلها

4. ابحيلها امصوله او على احسين انتوت

او جرت البصره او على الكوفه انطوت

5. احتوت بالطف يا علي كلها احتوت

هاي عرصة كربلا او تفصيلها

6. هاي كلها اتكورت بالطف سوه

او سدت افجوج الفله او ريح الهوه

7. اتعزلت سبعين كل جيمه ابلوه

و اللوه ابسبعين الف تعزيلها

8. اتعزلت و تصيح يا ثار الوليد

اليوم ياخذ من علي اديونه يزيد

9. دق ابدمامها او تهجم تريد

هجمت الكعبه ابعساجر فيلها

10. هتف عباس اوحده او صار الجدال

و آل هاشم قالت اعلينا النزال

11. و الاصحاب اتناخت او قالت محال

بالنفوس احنه الذي نبديلها

12. اشبول حيدر قالت العز بالصكال

و الابطال ايهولها املاقه الابطال

13. هاشم التنهض بالحمول الثقال

و الكلافه أهل الكلافه اتشيلها

14. قالت الانصار ذله اعلى الانصار

لو بدت هاشم نقص و نصير عار

15. ليش طلقنه النسه او عفنه الديار

كون حق اهل المجد تجريلها

16. تجري حق المرتضى او حق البتول

انجمعت شبانها شيب او كهول

17. قالت الاصحاب يحسين اشتقول

صحبك يبو هاشم التبديلها

18. قال تبدي اصحابنا او سالت العين

او هز حبيب العلم عد وجه الحسين

19. اليوم ندمي الزان و نشيد الدين

اليوم اهموم العليك انزيلها

20. انزيلها عنك او نسكن دورها

او نورد الكوثر او نحظه ابحورها

21. اتهبه الكوفه اشما كثر مكثورها

بالمواضي المرعفات انشيلها

22. شالو اعلام العدم و تنشرت

و الغماد اتطايرت و تكسرت

23. و القلوب اعلى الدروع اتبسمرت

و الارواح اعلى الحتف مصفيلها

24. اصفت او مادت او جادت بالنفوس

او صالت او جالت او جتلت جم عبوس

25. صار هندس كونها او همه الشموس

ابدور بالتم او جواجب ليلها

26. هم جواجب رجم نار او ضهضبت

جالمشبله ابشيب هاجت و اغضبت

27. تشلع المدرع المشرع و الثبت

و البطل ينطر و لا يعصيلها

28. سدرو بيد العلم و السيف بيد

او هزو الرايات عد وجه العميد

29. أوبجت زينب و اعتنت عزها العجيد

او نخت هاشم و الدموع اتسيلها

30. نهض عباس العجيد او هلهلت

او نهض شبل احسين جالصل و انصلت

31. او نهض جاسم و آل هاشم و اعدلت

جالطواد الراسية أوقت سيلها

32. موت همة الموت شنهو يهبة الموت

و المنايه اسيوفهم توميلها

33. نضت هاشم بيضها و تعزلت

و الارض تلها او سهلها اتزلزلت

34. طير حر او صادف الرف و انفلت

يو طيور اليمثل أبابيلها

35. اطيور ابابيل او طوت كل الجنود

اصفوف و اسرب و الملازم و القعود

36. البيض فوق البيض جن زجر الرعود

فوق تسمع بالسمه ترتيلها

37. بالسمه اترتل اسيوف اهل الغنه

و الجنه اتخالف تشابج بالجنه

38. من طب للطب أوثاره المرعنه

اتقول مرميه ابحجر سجيلها

39. راميتها امصيته اتكر او تطر

اتهلهل الها الخيل من دهم او شقر

40. او تصفيح الها بالوغه السمحه السمر

و الصوارم بالصك اتغنيلها

41. عنت الجاسم او تطرب من يطب

او ضنوة احسين البكر جنح او قلب

42. او شبل حيدر لو طفت نار الحرب

يوقف ابروس او جثت يلهي الها

43. ما عطو بجفوفهم عطوة الذليل

او بالحجر لسيوفهم تسمع صليل

44. كربلا الصاع او بني هاشم ثجيل

وفوا عيون الكتايب جيلها

45. جالو الطف روس من روس العيون

أهل بيت اللي يحامون الظعون

46. والله لوله القدر و الكاين يكون

جان آل الله الأرض تغنيلها

47. لوله امر الله عليهم ما يصير

من أهل كوفان ما رد الخبير

48. الله ناداهم او خفو بالمسير

لوله امر نوت تمحيلها