ليش اجيتي وفززيتي اجروح جانت غافيه
ليش اجيتي وفززيتي اجروح جانت غافيه
وليش ترضين اعله غيمي
يمر سماج الصافيه
ليش فززتي الهوه وجبتي الحنين
وبكلب ميت ندهتي العافيه
لي نفختي ارماد روحي
وجمريتي اشواك جانت طافيه
ليـــــــش اجيتي
ليش اجيتي انه كبلج كبر منسي
ابلا ورد لا ذكريات لا حلم وردي وليالي دافيه
وانه كبلج جنت ترس اعيوني انام
وعل عشك قدمت لا النافيه
ليـــــــــش اجيتي
ليش اجيتي وعلكيتي اسنين عمرج علرفوف
ليش مو عندج عقل وعيون
ليهسه تشوف
ليــــــــــــش اجيتي
ليش دكيتي اعله بابي ما فطنتي
اعليه باني العنكبوت
ليش ما شفتيني ميت وشابع من سنين موت
ما قريتي قصتي بحيطان وجهي
وصوتي كومه اجروح ما يشبه الصوت
ما شتميتي التراب العلى اهدومي
ولا فطتني الحيرتي وهوسة اهمومي
وخطوتي المحتاره يا سجه تفوت
لــــــــــــش اجيتي
ليش اجيتي كون دكيتي اعله بابي
كبل لا تطفي ابتسامات الحروف
من جنت بأول شبابي وجنت اعيش اربع فصول
وكل فصل البسله ثوب
ليش من جان الندى اعلى اغصاني
ما مديتي شفتج
ليش هسه اعلى الخشب كامت تلوذ
ليش يا اول اذنوبي
كون كل اذنوبي مثلج جان قدست الذنوب
لــــــــيـش اجيتي
ليش اجيتي صحره روحي
شلون اهي ترويج ماي
وشجره نزعها الخريف اثيابها
وباك الفياي
وغنوه خاصمهه الطبل وتمدتت بحظان ناي
ليش اجيتي
كونج اني جان ما شفتيني جاي
دربي ظلمه وزحمه خطواتج وراي
ليش اجيتي
ردي مابيه ربح عمري خساره
وعمري هوسه وناره تجوه أعلى ناره
ردري كاس شما فرغ ينترس ثاني
وخوفي تنداسين لو صرتي جكاره
ردي يل طيب العسل ساكن السانج
ليش تنخلطين يل حلوه مراره
لــــــــــيش اجيتي
:::::::::::::::::::::::::::::::::::::
الشاعر المرحوم محمد الغريب
رد مع اقتباس
