دارميات بمناسبة حلول العيد الأضحى 2014
شعر بمناسبة حلول عيد الأضحى
بمناسبه العيد السعيد
احب ابارك واهني كل اعضاء هذا القسم الرااائع
دعواتي لكم ب الخير والبركه واليمن والسلام
وجعل الله اياكم اعياد ومسرات وابعد عنكم كل سوء
ودعواتي للعراق بالامن والامان والسلام الهي يرجع كل غائب لااهله
ويجعل الخير والبركه في شعبه
وكل عام وانتم بخير
مودتي وجل اشواقي واحترامي
ماعيد اولا عيد حد ما تردون---اوعيديه اودي الروح لمن ترجعون
غايب حبيب الــــــــــروح بالعيد عنه---يا ربي كــــــــون اليوم يلتم شملنه
باقه ورد اهديك يل گلبـــــــي دارك---واكتب على الورگـــات عيدك مبارك
گلبي الصرخ اهـــــواچ ما غيرچ يريد---شفتچ ورد رمــــــان وضحكچ العيد
بوسة عشگ يا عيد وصـــــلها لهواي---گلبي اشتعل نيران مـــا برده المــاي
بس الك هذا العيـــــــد وده التهاني---ننجمع كون اليوم بس انتـــــــه واني
يكليجه العشاگ لتضـــــــــن املها---لفي الصبع يهـــــــواي واكلها كلها
بوسه وتهاني العيد لعيونك تـــــروح---واجمل عطر يهواي من خــدك يفوح
گالولي باچر عيد المن أعايد؟؟
مادرو انتة العيد وبگلبي گاعد
العيد اجاني العيد وشلون انا وياه
نساني كل الناس وعلمني على الاه
العيد اجاني العيد وشلون اهنيك
اهديلك اني الروح لو بيها اخليك
هاك العمر واختار من عنده شتريد
بس كون اگضي اوياك صبحية العيد
عيدية الك بوسات ما منها موجود
تطبع على الدلال لامو عالخدود
بالعيد اعايد ناس بس أنته لاله
هم شفـت واحد يوم عايد هلاله
خابصنى كلبى عليك ما ادرى شيريد
مثل اليتيم و ضاع ديناره بالعيد
وجهة نظر للعين واتگولي موعيد
وتعيد بملگاك وبشوفك اتريد
تكتب يريت الناس واتمنه تقره
واحلم يمرنه العيد ما عدنه فقره
ياخوي اجانا العيد وانت ولا اجيت
صدكَني من فركَاك موحش ترى البيت
اتمنة اصير شموع واحضر بعيدك
واكتب بنص الكيك عاشك واريدك
ماردنة عيديات من شفنة الهلال
بس الامان نريد والغمة تنشال
لوتعطش انته بيوم من عيني الك ماي
وهديلك الدلال بس عيد وياي
عيد وسعيد ايطول مصباح الاعياد
امن وسلامه ايصير يومج يبغداد
وجهك صباح العيد ماحاجه ننطر
بس اطلع انت اليوم شيعتنه تفطر
باقة ورد وزهار ابعيدك اتفوح
بس اضغطت ارسال راحتلك اروح
ننتضر عيد الخير يشرق صباحه
وثوب الزعل ينشال نخلع جراحه
مبارك تكول الناس من عايدتني
***
مبارك عليمن عود شفتك شفتني
يفلان اجاني العيد بس انته ماجيت
عايدت كل الناس بس انته ظليت
حلكي اليبوس بشوك شفتينك يريد
وديته الك ماجاك وي طيت العيد
بالعيد انته اذا ماجيت تدري انته شيصير
يكتب براسي الشيب مثل الطباشير
عيد التشوفة الناس وتكيف علية
جذاب ابن جذاب كل طعم مابية
عـــيد واجاني العيـد وانتم بعيـديــن
تبجي وتريد احباب مجبورة هالعين
تدري انه گبل العيد عاشورك وياي
حاسمهه لو مو عيد ماتضحك اشفاي
گالولي اجاك العيد چايمت تهيد؟؟
عيد اليمر بجفاك ماينحسب عيد
زعلان اضل بالعيد واكلبه هوسه
رايد صلح وياي! حضرلي بوسه
مااعيد بلياك يلدربك بعيد
ولو مااشم هواك ماينحسب عيد
هم تدري يبن الناس بس باجر العيد
ودك تمر واطيك من عندي شتريد
لاسلمت بالعيد جثر سلامك
بلجن تبخ تنور كلبي بغرامك
وهذا الدارمي للشاعر مشكور العايدي من الحي
لاتشتري انته اهدوم من يمر عيدك
اهديلك انه الروح فصلها بيدك
وقد عقب الشاعر منهل هادي متهكما
لافصلتها اهدوم روحك عليه
تركد بعد يومين شيضل اليه
وهذا للشاعر علي تكليف الصكبان
كون التهاني جناح وتطير الك طير
وتكلك بها العيد ريتك بألف خير
وهذا الدارمي ورد من متذوق
بسمه وفرح واعياد ممليه دارك
من كل كلب ولسان عيدك مبارك
وهذا ورد من متذوق
سدينه باب العيد وانته بمكانه
وعفنه الكمر ونريد منك ضوانه
وايضا
عيد الفرح ملكاك يالرقتك ناي
يالتسوه هذا العيد والكبله والجاي
وايضا
جيتك يبعد الروح وادري انته عيدي
جبت الكلب وياي عيديه بيدي
وايضا
ريت بسعاده وخير اسمع اخبارك
يا اغلى كل الناس عيدك مبارك
وايضا
قدمت بس جكليت للعايدوني
بس انته لو مريت تاخذ عيوني
وايضا
هذا وهذاك العيد والكبله والجاي
ماراح اعيد بيه اله انته وياي
وايضا
ابعيد الأضحى اليوم حاير شودي
انته بغلات الروح هذا انه ردي
رد مع اقتباس
