اهدي قصيدتي.. الى جميع ابناء بلدي الكرام
رحل شهرالكرم وافراحه عالباب
وبانت بهجته وهلت اعياده
واليصلح باخوته وكل الصحاب
يحوز الفخر واينول الرياده
بادر للاخوة اوصير محراب
ربك ينطي للبادر زياده
واخوك الدار وجه ابغيراسباب
اكسب بي ثواب وانت ناده
عليمن هالتناحر .. لجل اللقاب
على اكنوز العرب لو عالقياده
شو ربك يبعد اهلي الوهاب
وهو المبتلي بعيشة عباده
ربك للتقي يفتح الف باب
وينطي لكل بشر مصلح مراده
عجيبة اخوان نكعد مثل الغراب
بنفس المسجد ونفس الوساده
اليكول الزعل مرغوب جذاب
مثل نار الجمر يحرك رماده
اليتمسك باخوته ابد ما خاب
وربك بالحشر ينطيه شهاده
وتره حته الطيوراتعيش اسراب
اوجود المجتمع بالارض عاده
واليمتنع عن لمة الاحباب
حرام انروح ليه وانضوك زاده
احنه اهل الماثر واهل النساب
من ربك ارضنه انملت ساده
تفرقنه شيع للاسف واحزاب
بدل ما نجتمع صرنه فراده
صلاة وقبلة وحدة ونفس الكتاب
ونبينه المصطفى ونفس العباده
انكلب ذاك التماسك صرنه نشاب
وكل واحد اله مطلب وراده
التفرق موت , واليدناه ينصاب
والحب واللقا والود , ولاده
تعالو انلم شملنه وننسه العتاب
ونرد للبلد حبه اوداده
تعالو انعيش ونعالج الاسباب
وليعاند نجي ونكسر عناده
بلدنه انشوفه وسط المعركة انصاب
نحميه .. لو ندفعه للاباده؟
صفو النيه خلو الفرح ينساب
وخلونه نحس معنه السعاده
اليطالب باخوته ايصير عراب
وفعلا يستحق منه الاشاده
وربك ما يضيع ذرة احساب
كريم يراقب وينظر عباده
حليم الوضع سيفه ابوسط الكراب
والى الاعمار يتحول جهاده
وجبيرالشاف شاتم لو سمع ساب
واتحمل , واكال الهم وعاده
حكيم وايحفظ ابعقليته الركاب
العقل كالطير والبي بخت صاده
مانكول الامل شد راحله وغاب
ولا نكول احنه ما نملك اراده
عراقيين ما بينه اللي ينعاب
احنه اهل الكرم واهل السياده
احنه اتباع حيدر حادي الباب
اذا منتبعه جا شنهي الافاده
والصديق بينه وابن خطاب
العادل واللي فاتح دوم بابه
البشر عنده عقل ما عنده انياب
حرام ايعيش بسلاحه اوعتاده
عله اتفه قضيه واتفه اسباب
اصبعه دوم حاضرعله ازناده
لتكلي الصلاح اشوده واشجاب
صلاح الناس عند الله عباده
اليزرع طيب حتما يحصد اطياب
واليزرع حقد , بس هم حصاده
كل حر يجتهد لجل الشعب ,صاب
وصوره الموطنه ينطي وكاده
وكل من يسعه يتفقد الغياب
شريف , ويستحق اجمل قلاده
وكل طيب ويسعه ايلم الحباب
سفير ايصير ويمثل بلاده
(2)
سامرتك
سامرتك عمر ناشف ولا نتّاگ
وي اسنين عمري اوثيِّعت بيَّه
ثاريَك ولاتسواش صم اتراب
دمع تمساح تبچي اوگَرصتك حيه
ورجتَّك عليَّه اوبين اديك اكتاب
تقراني وتورج الوادم إعليـَّه
لوليتك بديه اوليل يرضع ليل
تكبر يوم وازغر بيك يوميه
انعثِّل بيك ومبريَّد نحيل الحيل
بالصحره اوتگطع ليش رجليـه
انت العين گتلك من يرِّك الشوف
تفگسها إعله شنهي الچانت أُربيه
أهمِس چنت باذنك لو حچيت اوياك
حدر اذنك أمعلِگ شفتي ترچيـه
أجلِد روحي لجلك جلدت السجان
وانت اوياي تجلدني اعلى مابيه
موذنبك يغاتي الصوج باليهواك
يفطر للصيام ابعظم ......جريَّه
غشاني التهنكز والحچي المعسول
جول اتجول مشيك لعب ...چوبيه
تتطوه ومشيتك مشية الغرنوگ
اومن توگف اتصير ابعيني ملويه
ثاري إخشاله كلك .. معدنك فافون
ماينظف ضميرك خابط .......النيَّه
اشگف بيدي عنك طعنة العادوك
وانت ابظهري طاعن الف شِبريه
ابنهر تيزاب لو إغطك فلا يجليك
إسكت والسوالف خلها ...مطويه
ما أبريك ذمه ليوم يوم الدين
وانا ابشين فعلك ذمتي مبريَّه
****
آنه بالنسبه إلك كلش فقير
آنه جامه وادري انت المازه
شلون مارايد تفصلني أصير
وهذا موفد شي صعب إنجازه
لكن اني بعزتي كلش چبير
وغير الله الروح ما معتازه
اني مثلك بشر مو عندك اسير
وبالنتيجه اثنينه ننشال فد إجنازه
احترس مني اذا وكتك يدير
واليجازي الناس هم يتجازه
آنه وانته اثنينه بنفس المصير
مثل طول قماش عند ....بزازه
وك لا تعوف النهر وتخاوي الغدير
ولا تصُّف الغاب ويه.... التازه
ولا تواعدني تلبسني حرير
وانته تتحسر گمت عالبازه
اشما اريدك تختمر تبقى فطير
وروحي صُبرتلك صبُر خبَّازه
*** *** ***
(3)
ربك صورَّك
ربك صوَّر بوجهك علامه
اعله عينك سيف..واعله السيف شامه
انطاك، وساترك من شر العيون
الكريم وحاطك بسور السلامه
ودستر وجهك وداره اعله فرجال
مثل دورة بدر ليلة تمامه
وخذه الثغرك إمن إخيوط الشمس خيط
وطرز بين الشفاف ابتسامه
وجمع جيد الغزال وعين شاهين
وحسن طاووس وترِهدِّن حمامه
وظهر سدره .. وعذوبة ماي شلال
وخصر دله .. وترف ريشة نعامه
وهبوب عذيبي غبشه .. ونفحة ورود
ومحنَّة ناگه ومروة نشامه
وحلاوة كيك عيد .. ووهج ياقوت
وطراوة مَلمل .. وهيبة زعامه
هذن كلهن جمعهن ياترف بيك
اموت وقهر كاتلني مرامه
وتعمَد حتى بالدنيه احترگ بيك
ويحاسبني گبل يوم القيامه
*****
رد مع اقتباس
