يا دمعنه
يا دمعنه
معاند المنديل خاف ايمر عليه..!
وياوكتنه
العايف الضحكات ويدور بواچي....
آنه حد فهمي چذب دمع الفرح
العين من تفرح شكو تنزل دمع
الضحكه والدمعه شرايچ..!!!!!
النار جوعانه
شكثر تاكل شمع..؟
الگاع من تنزف
يطگ بيها نبع
النهر من ايفيض
معناها شبع
وياوكتنه....
ياوكتنه الما قنعنه ولا قنع...!
وياوكتنه
الحطنه بالسچه الفلا مرها قطار
واحنا غشمه
وتالي خلصنه انتظار
احنه ناس امن الله
ما نعشگ نهار
احنا خريجين مدرسة الحصار..!
الليل لو يرضه بصبح
يعني انتحار..!!!!
ليش عدنا الگاع مزروعه چذب..؟
وليش عدنه النسمه ما ترضه تهب
وليش ما نشتم بعد ريحة شلب
وليش عدنا اجدام ما تلگه درب
وليش عدنا المره
عاجر من زمااااان
حتى لو تاخذ محب..!
آآ يگاعي
الحاظنه افتوگ الحرب
آآ يگاعي
الماضگت منج عذب
المسيح بگاعي الف مره انصلب..!!
آآه منعدنه شكثر بينه ذنب..؟
شمعنى عشنه
شمعنى اجينه
شمعنى زاعلنه البلابل
شمعنى شاجور التفگ
عدنه مقدس..!!!
شمعنى طفل البيت
شابگله مسدس..؟؟
شمعنى زتينه الضمير
هناااك لديره البعيده...
شمعنى ما ردنه النريده..
عفيه وادم عدها كل عاشگ مخالف...!!!
وعدها كل ابيض ... نشاز!!
وعدها كل احمر نفس..!!!!
ناس متروسه دغش
عدها بس الطعنه جائز
مدري وين انريد... مدري ليا حرام؟؟؟
ومدري ليش انضوج
من چلمة سلام....!
ومدري ليش انموت
من طاري ( الجميل)
ونشتري البوم بحمام..!!!
ومدري ليش
انغار من چلمة رفيج
ونفرح بچلمة خصام...!!!
احمد العبيدي
رد مع اقتباس
