عرس المقابر
باجر محكمة وما يرحم التأريخ
وأحنه الحدث نفسه وأحنه كتّابه
جم راس اللي قبل غيرة حجابة اّطيح
وجم راس انشلع وي شلعت إحجابه
يا هو اللي تكضة يصيح أبو الحسنين
وكلهه اتكترت من فلّشوا بابه
هل يستوي شلون الظلمة ضد النور
إذا يحجي الضمير ويحسب أحسابه
واحد كال ربي الراحة وي الموت
أواحد ناده ربه بدمه وصوابه
ياربي الفرج يومية كون نموت
ويدعي بجاه ربه أتسحكه دبابة
كبرنه وللعرس موته أحنه مشتاكين
وليلية المكابر تلفي خطّابة
جف الحنة دم وحنة العريس
ومن طول الجفن فصّلنه جلبابه
صفت حمرة السمه ومن دمنه خضرة الكاع
وألف عريس عرسه بليلة مصابه
مات الأمل عدنه وكمنه شيعناه
وعلى راس الفرح شدينه عصابة
فوك جتافنه الوادم بنت تاريخ
وباكوا كل مجدنه ولبسوا إثيابه
احنه الصدك تدري وهمه جذابين
وجذاب الزمن والدنيا جذابه
كدرنه الحياة اعلينه مو مقياس
مصبوبه اعله كدنه المكبرة اصبابه
خل نموت باجر مو مهم أنموت
بس المهم موته اتشّرف اسبابه
اسود اشكد مشت من مر عليه الجوع
وصارت للثعالب موطن الغابة
ناس تصير سعفة وتعتب اعلى الريح
وتلوم القدر وتكثر اعتابه
وناس تبوك بيتك وأنت بيه موجود
والأضرب بعد من تسأل اشجابه
حمامات بطبعنه ولازم احنه انطير
إذا حتى الحدايق صارت ذيابه
تكلي اشجابنه وتسأل علينه منين ؟!
وأثر جدم الحرب بجتافنه اترابه
من دمنه ودمعنه انشقت الثورات
وعالخالي اجو بالثورة طلابه
اسأل عالذبحنه وياهو حد السيف
وياهو الوكَف يمه ولازم أكَرابه
عصرنه دموعنه بقالب حزن تعبان
ومن دمع الحزن سوينه لعّابه
مو ماي الحياة أشربنه ماي الموت
تعبنه الهوى وفرانه دولابه
ولهذا عمرنه يتعب اليقراه
بالمكَلوب لازم ينقره اكتابه
حاصوده الحرب تكره زرعنه يعيش
وكل موسم نعيش الحصد وإرهابه
وما يشبع الماخذ حصته من الموت
حصة عمرو أخذه وحصة أصحابه
منقول
رد مع اقتباس
