إستعجِلَت شوگي خمر...
إستعجِلَت شوگي خمر...
والكاس سكران بجدايلهه وعطرهه
إستعجِلَت ليلي وقرَت كل نجمة بيّه
وبللت گلبي بخمرهه
البارحة بيّن حلمهه
البارحة سمتني بأسمي!
وحلفتني بكل حلم بيناتنه وكل نيه بيضه أنسه كل حزني وأشمهه.!
يخمرية الحزن حزني
يخمرية الحزن مو ليل حتى إنّام
الحزن شباجة بضلوعي
وبس عيونج النرجس قرت حزني
يخمرية .. لگيت الناس بعيونج.. ولگيت اول غصن بأسمي.
ولگيت الفرح جكليت وبرد ضحكة
ولگيتج..!
ولگيتج ماي واتبده بضمه ثيابي
ولگيتج وأحتفل ليلي... وبنيت أول مزار بگلبي للفقره
وچف حنة نذر غيّاب منتشية بحزن بابي
غنيلي وألبسي الطيف اليلمچ
وتعالي الحلم ما يكفي... اريدن بابنه يشمچ
تعالي هلال... تعالي أندلي المتيهين
درب الشوگ ليل وناس
وأغنية اعله گد حلمچ
وشمّيني الحزن هم باب للفردوس
ولهفتي السمره تشبهني
يخمرية الظفيرة بچفي ضلت ليل
وبگلبي الضمه يغني
تعالي الحلم ما يكفي اريد شفاف تندلني
أريدن ناس تسهرني
أريدن عين.. تحلمني و...تفسرني
أريدج باب للدنيا
وبعيونچ أحب الناس
تعالي أسراري بأثيابج عطر ماشمته الدنيا
عطر خمرية ملهوفة نست چفي بظفيرته
بهذاك الليل
تعالي العطر ما ينلم وأحلامج بعدهي أسرار
وأثيابج لغز روحي
تعالي ولهفتي أسوارچ
الشاعر"باسم الخاقاني
رد مع اقتباس
