وحك رصعة اخدودك وحك شفتاك
انسبيت بيوم وسط الروح شفتاك
اشيخلصني بعد شرتاح شافتاك
وبعدك والقرب نفس الاذيه
.
.
جروحك للهوى ياصاح شرهن
وليالي الضيم ماينحمل شرهن
رهنت الروح الك وبعد شرهن
اذا حتى العمر ما عاد اليه
.
.
فزع طبع الصبر بينه منخوينه
ويا روحي جروحي منخوينه
اخوي العييد بحزني منخوينه
انخه اشلون وجفوفي بديه
.
.
شفت طوله وعقلي شت مني
عيونه قبل اشافه شتمني
هيم بيتج ياروحي شهتمني
تمنين الذي يصعب عليه
.
.
يهل روحك على الطيبات تربه
وعلى دربك تظل العين تربه
ياريت اكعد على مصلاك تربه
وابوسك من تحط وجهك عليه
سفن شوقي مشت بشطوط وانهار
ونفذ حتى صبرها الروح وانهار
احن لشوفتك كل ليل ونهار
اشوفك وين واحجيلك البيه
الك هالعين شاطي وذيج وك بر
ياريت انا بحظنك صغير واكبر
شفتك انا بس صحت الله اكبر
لأن حبك بلاء وعم عليه
امير انت مظيفك دوم ينظاف
وكلبي من الالم مايوم ينظاف
كون العمر فوك العمر ينظاف
لشيلن عمري الك وانطي هدية
قلب صافي لون تهوه قلبنه
وابد مايوم عن حبك قلبنه
احنه ظلوع الك وانت قلبنه
نخاف على القلب من كل اذية
احوك بثوب حسنك وانسجنة
وبجهنم حبك اقبل وانسه جنة
انحبسنة بقفص عينك وانسجنة
وترضة رمشك كلبجات بأدية
جروحك للشمس ياصاح شرهن
وليالي الظيم ماينحمل شرهن
الك عمري رهنته بعد شرهن
واظل مديون لأخر نفس بيه
عذاب البيه كافيني وزايد
واظل للموت احبك وزايد
بمزاد الحب اريد اكعد وازايد
واكول للناس حبك بس اليه
حبيبي شلون ماحبك ولاأبيك
امك ماتحن مثلي ولابيك
عساهن بيه لوعاتك ولابيك
واحول كل وجع منك عليه
كلبي ماصفه لغيرك وفضلك
وروحي مانست طيبك وفضلك
اميزك بين الف صاحب وافضلك
وتبقه انت الوفي الغالي عليه
يصاحب من تماشي انسان كلبه
ودور بالأساس وشوف كلبه
اذا شفته اناني وبيه كلبه
تجنبه ماوراه غير الاذية
اريد اكصد لعدكلبك واظيفه
واحط حبي على حبك واظيفه
اذا هذا العشك صاير وظيفه
ما اطلع تقاعد للمنيه
لون تنسون حبكم منسة حبنة
وباقين على حبنه منسحبنه
مثل امبير حبك من سحبنه
الف امبير حبك صار بيه
غيابك خلخل عظامي وهدهن
واجر حسرات ببعادك وهدهن
إلي دمعات لو ابجي واهدهن
تفيض اليابسة ونغرك سويه
خفيت جروح كلبي وانت داري
وشكثر دارت كلبي وانت داري
تكلي ارحل لدارك وانت داري
وشحلات العمر لو نبقه سويه
احبك ما احب عالأرض سواك
سبحانه الذي من طين سواك
بشر لكن ويه الكمر ساواك
واحد بالسمه واحد بين ادية
خيالك ساكن بعيني ولاراح
وعكبك ماشفت ونسه ولاراح
تره العقل شرد مني والك راح
فراكك يالمحب اثر عليه
الدهر بجفاك طشرني ولمني
وعليك الكلب عاتبني ولامني
فراكك حيل اذاني وألمني
وظل حبك اثر مطبوع بيه
من هجرك بقه الدلال بس تك
ولك لاتلعب على الحبلين بس تك
امس بالطيف مدري منين بستك
لأن كلك حلو وتاهت عليه
نصحت الكلب من حبك ولافاد
حركته بنار صدكني ولافاد
علاج هواي جابولي ولافاد
بس انت علاجي شلون بيه
الكلب من ين**ر بالوصل شده
واخبرك ماتدوم بيوم شدة
سمعت شراي دافع بيك شدة
واني الك روحي ادفعها هدية
يون بأسمك دليلي ات وانت
تاه وريد اسألك انت وانت
يحب اثنين غيرك انت وانت
تركني وانت بس ظليت اليه
ماصخ جنت بجفي ملحتك
تلح ماتلح متهمني ملحتك
يعنكود العنب لتظن ملحتك
قبل ما اجيك طحت بين اديه
رد مع اقتباس
المشاركة الأصلية كتبت بواسطة abas satar
