عمه هاذ آنه رقيه وكلبي خالي*** ذابت ايامي وسنيني وعز دلالي
ذبحوا الضحكه بشفافي وهم صفالي*** أنده من الضيم بس حزني الاجالي
عمه من قوسه رماني*** جروح خلاهه بسهم
صوب افادي وجواني*** وعمري بصوابه انهدم
انزف دموعي انهار*** شلون ابرد يانار
********************************
عمه شفت آنه ابويه ونحره دامي*** شلون كلب اللي يذبحه وجبده ضامي
ما بكه أحد ينصره ولا محامي*** والذبح نحره ذبح دلالي هامي
عمه كل نبضه بدليلي*** سيوف وتشك الصدر
وانهدم هالحظه حيلي*** وانفجر مني الصبر
والدهر كلبي اختار*** شلون ابرد يانار
********************************
عمه اتحمل عطش بس عمي يمي*** ارتوي بشوفت كمرنه يزول همي
عودي رق وجن ذبل وياه اسمي*** عمه ياذيني العطش يسري ويه دمي
اتحمل هموم وبلايه*** بس يظل يمي الكمر
راح لسهام المنايه*** تعنه ولماي النهر
غاب نور الكرار*** شلون ابرد يانار
********************************
طول غيابه وخيامي اهتز عمدهه*** وغابت نجوم الليالي بلا سعدهه
فكرت بزنوده ظل جفوف عدهه*** لن رقيه تنادي ماينهض اسدهه
عينه ياعمه دميه*** وطفت عيون الدهر
وطاحن جفوف الحميه*** عمي بالهامه انطبر
وغاب عن الانظار*** شلون ابرد يانار
********************************
امشي ياعمه ودليلي بهمي يعثر*** مابكه بصدري كلب بالهم تفطر
موعجيبه آنه يسيره وجدي حيدر*** شلون افارك كل هلي الله اكبر
بكل نفس اشتمه آنه*** الا واذكر كل هلي
وهاج دلالي بحنانه*** لا ابوي وكافلي
عنهم اخذتني اسفار*** شلون ابرد يانار
*****************
لي الشـــــاعره شهد المعموري
رد مع اقتباس
المشاركة الأصلية كتبت بواسطة قلب من ورق
