بالي يمك يلي بلصفنة بعيد ...
بين جلماتك بعد يمكن شهر ...

ولو تمر بية بعجل مر السحاب ..
الغيم من يروح مايترك اثر ..
اقرة بعيونك هجر كبل السلام ..
وادري راح تروح وتكلي القدر ..

ياخسارة بسرعة شديت الرحال ...
جنت متأمل اشد بيك الظهر ...

اكره الظلمة كبل بس هسة لا ...
حزني نص الليل يلوجهك كمر ...

امشي واعثر والربع يتغامزون ..
وانة مو مدمن شرب مدمن سهر ..

ذابلة اوراقي وشلت واهس ربيع ..
فاس يلكة الشايل اطباع الشجر ..

يالمأملني بعشك اخضر تعال ...
ذكرياتك شيلهن صبري كفر ...

عمري كلة بطرف مادايس عليك ...
فوك كلبي ادوس جدمك ماعثر !! ...

هواي رادوني وردت وياك اعيش ...
موش واحد تارك لعينك بشر ..

اكره الي بكلمة يحجيلة اعلة ذيب ...
لان مو انسان ماخان وغدر ...

الوفة ماهدني ابد هدتني اديك ...
حملي ماشلتة وشلت جنطة سفر ...

صرخ كلشي بداخلي وكلك تعال ..
وسكت كلشي بداخلك مثل الحجر ..

انة وانت اثنين شبعنة الزمان ...
حصتك ضحكات بس حصتي القهر ..

ورادو يعرفون سر دموعي وين ...
الطبيب واهلي ما واحد كدر ...

مثل وردة انكطعت اكبال الفراش ...
هذا انة انسان احساسة انكسر ...

الوردة لو كطعوها ماتلكة مكان ...
لو بجف محبوب لو فوك الكبر ...



منقووووول