ياناس كفى
ياناس كفى
الأيام فى الدنيا
نعم المدرسة
الأيام فى الدنيا
أعظم مدرسة
ويبقى السؤال
كيف إبتد ا
لمن خلاص
نمى وإكتمل
ولما إنتقص
كيف إتنسى
من غير أسف
من غير أسى
ما أصلها الأيام
هى نعم المدرسة
قالوا الغرام
فيه الوفى
قالوا الإخاء
نعم الوفى
قالوا الصداقة
اسمى آيات الوفى
لكن نسوا
ما أن دعى
داعى الوفى
يا ناس كفى
قولكم كُتُر
وقالت الايام
كمان قولا كُتُر
إيه يعنى
لما تشيل بداخلك
كل سماحة وكل وداد
لى زولا تخصه من العباد
بى كل جميل
واحساس لديك
راقى ونبيل
ويقرا قلبك
زى كتاب
صفحاته بين راحة يديك
فى الله تعزه
مودة صادقة
بريئة ما بتعرف طمع
ويشيل يبادلك كل جميل
واحساسه ليك راقى وبديع
زى اريج احلى الزهر
وفجأة يقطع كل وداد
كأنه ليك ماكان عرف
ولا وده ليك كان إنجرف
ويبقى العصار
مهما طلع فوق فى الفضا
للأرض يرجع
فى ارتداد
صحيفة خاوية
من المداد
تفسيره إيه يالقلتوا
فى الناس الإخاء
فيه الوضوح
أجمل صرح
فى داخله يترعرع وَفى
نحيى ونشوف
بكرة نتعلم كتير
وبدون حرف
الأيام بيت العلم
تبقى المعلم والعلم
وتبقى نعم المدرسة
وزولا تحبه وتعشقه
فى كل حنايا توَهِطه
بين الضلوع وتهدهده
تلقاه يوم خاصم
وفات عنك رحل
وكل الحصل
منك خلاص صابه الملل
خلاك يفتش عن جديد
شايلاه موجة من الامل
كل الجديد دايماً شديد
وبيه بصبح زول سعيد
وليك تب ما يكترث
ولا حتى يشعر بالألم
فايتك براك للحسرة
والهم والندم
وتقولوا لى فى الريدة
بتجلى الوفى
والحب بجسم
كل روائع للوفى
يا ناس كفى
ياناس كفى
لمنتين تعيشوا مع الوهم
حتى الصديق
العشت تزكيه الوداد
طول السنين
وتقول عليه وفِى وأمين
تلقاه خادعك بالسنين
زارى الرماد فوق العيون
إلا من ربك رحم
يا ناس كفى
ياريت نبطل بس وهم
ما نبقى طايرين فى الفضا
زى الطيور
بين التوهم والحلم
يبقى العذاء
يبقى العزر
إحنا بنعامل
بشر
ويبقى فى الناس الوفى
قلة فى ناساً نُدر
صفوة بين كل العباد
فيهم الخير منتشر
ويبقوا هم صفو ألبشر
مهما حصل زيف النفوس
إتمادى فى ألناس إنتشر
ليلا طويل بعياله
خيم واعتكر
يا ناس كفى ما تعمموا
وتقولوا فى الناس الوفى
عيشوا الحقيقه مجردة
خلونا ما نعيش الوهم
بقلمى/ودجبريل
رد مع اقتباس
المشاركة الأصلية كتبت بواسطة ياسين الجبوري
