هنا

[البارق]

روادنا .. لنكون أوفياء لهم

هي زاوية نستذكر من خلالها
عمالقة الشعر الشعبي العراقي
وما تركوه من أرثٍ أدبي رائع
لازلنا نتغنى به الى يومنا هذا
سأستعرض على حضراتكم بعض من
أعلام الشعر الشعبي الشعبي العراقي
أو ما يسمى في منطقة الخليج العربي
بالشعر النمطي ..
مستشهداً بقصيدةٍ لكل واحداً منهم
أتمنى أن تنال إستحسانكم

لي طلب من أدارة المنتدى المؤقرة
بتثبيت هذا الموضوع

ليتسنى لأكبر عدد من
الأعضاء والزوار مشاهدتهِ

طيب الوقت أتمناه لكم ..

[البارق]

- 1 -


قصيدة للشاعر الكبير
كاظم أسماعيل الكَاطع


إنتهينا ..


وانتهى
الما ينتهي وخلَّص حجينه


انتهينا


وبقت
كَطرات الوفه المذبوح تتناثر علينه


وبقت
للمجفين كوم اسرار عد روحي الامينه


وكون ندري
بالعتاب يفيد بيهم عاتبينا


وكون يسوون
البجي


جا بثنعش
ناظر بجينا


غافلونا


وباكَو
العشرة غفل من بين ادينه


تالي نزعوا
شوكَنا من كَلوبهم


وكَالوا
عوض عنكم لكَينا


تالي سدوا
بابهم من شافوا عللباب اجينا


شكَكَوا مكتوبنا
وبلا خجل ذبوا علينا


تندمينا


جينا
بجنازة عشكَنه المات غفله وأيّسينا


وابتعدنا
بعيد لكن طيفهم ظل يعتنينا


ظلت
حجاياتهم عالبال ما جلمه نسينا


ياما لسعتنا الشمس وبفي كَصايبهم غفينا


ياما فيَّضنه الوفه وحطّولنا المهجة سفينه


ياما ذبنه
العطش يمهم وبجدح جفهم روينا


تالي نزعوا
شوكَنا من كَلوبهم


وكَالوا
عوض عنكم لكَينا


أتندمينا


جينا
بجنازة عشكَنه المات غفله وأيّسينا
وابتعدنا بعيد
لكن طيفهم ظل يعتنينا

[البارق]

- 2 -


قصيدة للشاعر الكبير
عريان السيد خلف


ردّي .. ردّي
ياضعن شت عن هلة ، اوحدّاي
غربة .. البيه يحدي
ردّي .. ينباع العشك .. والياكَلب
تهوين صدّي
لا تهيجين الجروح .. اجروحي من تنلجم
... تدّي
وانة من دم اولحم .. مو من صخر
جبدة العندي
ردّي .. مليت الصبر .. وامكَاطر
الدمعة .. اعلّة خدي
وانة .. خلاني الوكت .. ناعور
بس اترس .. وابدي
جورت ليل الصبر . واعجزت منه ..
واهذا حدّي
بلجي من يغفة الجفن .. ما جلمة
التنكَال ، بعدي
انة موش اول زند .. يشتل
شلب .. ويحصد بردي
اولانة بس اتغربت والمعتنيلة ..
ايصير ضدي
ردي .. ردي
مالي حيل امعاتبج .. وانه العليج
اديت جهدي
غلّست .. عن الكَلت والكَال ..
كَمت اسمع .. واعدي ..
او صابرت صبر الطفل .. شربي الطفل
والحزن مهدي
واحملت ليل العطش .. وانه العيون
السود .. وردي
اوساهرت .. طول البعد لمّن
عشكَت اليال .. سهدي
والله جا مل او جزع .. لو قصتي ..
اعلة ايوب تسدي
ردي ..وانة .. موطبعي العتب
عالما حلاله .. ايصون عهدي
يا رخص ذاك الجدم .. كون اعله ياهو
الجان .. يبدي
او يامناحه ذلتي .. اوليل الكَضيتة
ادموع وحدي
وآنه .. من دم .. ولحم .. مو من
صخر جبدة العندي
آنه خلاني الوكت
ناعور
بس .. اترس وابدي

[البارق]

- 3 -


قصيدة للشاعر الكبير
ناظم السماوي


لا تسافر
مو خلص صبر المكاتيب الحزينه والدفاتر
لا تسافر
وحشة عيونك مثل طير الغريب بليله حاير
ويلي كل ضحكه على شفافك قصيده وآنا شاعر
لا تسافر
يا حبيبي
لا تسافر


لا تسافر عمري كل لحظاته ليل بلايه كَمره
يل على رموشك رسمت الغربه والهجران شذره
لا تودعلي الكَلب ما يرضه بالتوديع
كم مره اعذره
بين كلبي بين حبك آنا حاير
لا تسافر
ياحبيبي
لا تسافر


احنا مو صدفه تلاكينا
لاب العشك غربه وتعنينا
احنا يحبيب بدينه الشوك ما نكدر نعذبه
نبني حب بلايه دمعه
نبني دنيا بضوه الشمعه
وانته ترضى
يا حبيبي
الطير من عشه يهاجر ؟!
لا تسافر ياحبيبي
لا تسافر

[البارق]

- 4 -



قصيدة للشاعر الكبير
مظفر النواب

فوكَـ التبرزل


( ولما عادت المشاحيف محملة بالحزن أين الجرف يا رائحة القصب )

ودّيت جفن الكحل
مشحوف ناكَل حِسِن
ناكَل حنين العشك
شهكَات ليل وحزن
لا وجَّه ليل
بوصل ..!
لا طيف !!
كلك دفن
وامَّيتك لَذِّتي ..
وفوك التبرزل طعم

**
أشهك ..
لَوَن احضنت خصري ..
بذبح منجلك
ويدور حز العشك ..
داير مداري ..
فلك
ما بين نهدي درب قداح يسمر ..
الك
واميتك لذتي .. وفوك التبرزل طعم

**
افيش ..
شمني ..
بشهيك الروح
شكَة طلع
فُوج بحنين الصدر
طوفان دك ورصع
ليش آنه وانته بعطش ؟
موش احنه
نبعه ونبع
واميتك لذتي ..
وفوك التبرزل طعم

**
مابين شهكة ونفس
ليلتنه ..
هودج عرس
تاخذنه حضنه ..
ونِرِد
الشفاف تنكَط دبس
ززقني ..
بلذيذ النِفَس
كَطع النفس
للشمس
واميتك لذتي .. وفوك التبرزل طعم

**
أمس ..
الهواجس خذن مشحوف روحي .. بدجن
ما دكَّن بهاجسك ..
يا اسمر
معاضد حِسن
لا وجَّه ليل
بوصل
لاطيف ..
كلك دفن
واميتك لذتي ..
وكل التبرزل طعم

[البارق]

- 5 -


قصيدة للشاعر الرائع
سعدون قاسم


بس تعالوا
وفرحوا روحي معذبتني تريدكم
سهري ما مر عالليالي
حالي حال الشمعة حالي
والله لو احجيلكم
من أول حجاية تهلّ دموعكم
بس تعالوا
وهيدوا روحي مدولبتني تريدكم

...............


حاير أشكي الحال بعدك
وحاير المن أشتكيك
حسابي خليته علروحي
هيه دلَّتني عليك
تعذَّبتْ باول شبابي
وهذا مو أول عذابي
بس تعالوا

.................


يالبنيت الشوق عاود
انت باقي انت الحبيب
تدري بغيابك حبيبي
حتى بين اهلي غريب
بس تعال وشوف حالي
شعذّبت كَلبي الليالي
بس تعالوا

...................


بس تعالوا
ولو اجيتوا
كفوفنا نحنّيها
وكَلوبنا الما تنسى همكم هلبد ننسيها
هلبد بختنا يجيبكم
ونشم روايح طيبكم
وما أصدّك حتى لو جيتوا وكَعدتوا
عيوني احس بيهن غشا وما كَولن انتو
لأن صرتوا مستحيل
لا تجوني لانهار ولا بليل
صرتوا بس ذكرى عزيزه وما تغيب
صرتوا بس جروح بيه وما تطيب
وسفه يا خيبتو ظني
آنا حتى الغربة جني
وانتو ما نشديتو عني
بس تعالوا
ولو اجيتوا
كل عزيز بعمري
اطشَّنَّه فدى لعيونكم

[البارق]

- 6 -


قصيدة للشاعر الكبير
شـــاكر السماوي


صحوة جرح ..


صفگة عرس تسبي النجم
وچفافي داعبها الحلم
وعيون بالفرحه تلم
وچفوف نشوانة وتضم ..
حنة وسعد ..
وانة بدرد ؟
هلهولة تاخذني وترد
هلهولة صحت بالچبد
طيف انمرد مني مرد
امنهو الدرى بحال الورد ..
من ينمرد
منهو اليعد
شوغات .. وجروح .. ودمع
وشموع ما تقبل تشع
وهروش هاجرها النبع
وسنين كل ساعة بصدع ..
شرجي وبرد
ما ظل ورد
تتباهى بيه عين الامل
نحلة الدهر . سم وعسل
بس وين يا گلبي العسل ؟
شو غصن الگرنفل حمل ..
بس العرد
ذل الچرد
واليمنى ملت محبسي
والحنة عذرى محنطة
وكلما يلم عشه الگطا
ها .. والدهر غفلة صطه
وباگ الورد
وخلى الچبد
ينعى ويرد ..
لا ندّى عالورده النده
ولا غيمة زخت عالطبر
شگبن صبر
شگبن سهر
يا گلبي يا عش القهر

[البارق]

- 7 -


قصيدة للشاعر الكبير
زامل سعيد فتاح


حاسبينك ..
حاسبينك مثل رمش عيونّه
بعشرتك لينه
معاهدينك .. وانته كل العمر
وأيامه وسنينه
وداعتك ذاك انته غالي
حبيب وسلوة حچينه
انته روحي ..
وروحي جم حب تدري بيهه
حبها للكاع المشيت انته عليهه
حبها للمزنه الروت خدك سكيهه
وحبها للناس التحاجيك بحجيهه
حلوين ..
بوجوهم فرحة الدنيه الضاحكه
حلوين ..
بعيونهم ملكَه أحبه مفاركَه
العين لو شافت وجوهم باسمه
تشع بسعاده
والكَلب برياضهم فراشه بالحب حالمه
وطافح وداده
عاشكَين احنه وهوينه
ومثل ما ردنه لكَينه
وحاسبينك ..
انته خليت السوالف .. طافحة بروحي قصايد
وانته علمت الشفايف .. بالغنه تصوغ الكَلايد
انته .. يا انته وغرامك
وشكبر روحي بسلامك
همه روجات الفرات .. العاشرت فَي الشواطي
همه دجلة ومن دلاله .. يسيب ويه الكمر غافي
حلوين ..
صابغتك
من الغروب خدودهم
حلوين
مثل عشرة رازقي ..
ويه الندى بعهودهم
وحاسبينك ..
من هويتك ..
لمت روحي الما هوت بسنين صغري
وهيچ اثاري؟
الحب حلاته يشع سرور ببين صدري
ياغرامك
مثل طعمه روحي ما ضاكَت سعادة
الدنيا حد الشوف حلوه
والكَلب ينثر وداده
عيونكم تبرالي نجمه
تدور بيه شما تريد
طافت بروحي حنان
وكَرّبت مني البعيد
الدنيا حلوه
الناس حلوه
والوطن باسم سعيد
عاشكَين احنه وهوينه
ومثل ماردنه لكينه
وحاسبينك ..

[البارق]

- 8 -

قصيدة للشاعر الرائع
عامر عاصي

روحي سلّة خوص
وهمومك جمر
وإشتهيت الليلة أحبك من جديد
نصير ساگين بجذر
إنته ، يا فرحة يتيمة
إنته طيف
معلّك علة ذيال غيمه
وآنه هاوي ..
وآنه خاوي
وآنة جاهل باع عمرة ويه التتن
بين الكهاوي
وشيبة شيبة
كبرن هموم الليالي
وضفرن سنينك ضفر
ومرجحت روحي بكصايب
وبمصايب
وبخلك صبّير ، عطشان بثنيتك
ولو
ماباست شفاف الديم مطرة
ولو
ماظلّت بعد بالروح كطرة
بس اجيتك
وإشتهيت الليله أموت أباب بيتك
آخ مني .. آخ مني
شكد تنيتك

*****
وصبّت هموم الليالي دموع دم
تنزل وأعتهه
العين ، والدمعة برمشهه
الوالدة الودّعت بتهه
وأنته الخضيره ، المسج
والهاشمي العيّد بعيده
فرحة الجاهل ترس عينه
ويدف نبضه بوريده
إنتة الولاية الجديدة
الواعدت روحي .. ونستهه
وانته أهلنه
عيونهم هدوة مسية
والفرح بيهن جنح زاهي برفيفه
والسوالف واهليه
أنثرهن بطيّ الكصب
واسمع وحيفه
يازلف كلّش ترف ..
حدّ المنية
وآنه ناحل .. وآنه ذابل
وآنه ضيم أسود مثل لون المكاحل
آنه كل كطرة عرك صدر المغازل
وآنه كل عيد أصطبح بدموع جاهل
وأنته بسته
ياطعم صاج الشته
ودورة رغيفه
أنته وجه أمي ..
التنام متانيه ..
ابّاب الصريفه
أو وجهي صورة معلّكه
بحيطان غربة
توجع ضلوعي البسامير وتنيتك
وغطّه وجهي تراب الأيام وتنيتك
وعلّكتني خيوط شوك .. وما نسيتك
آخ مني .. آخ مني
شكد تنيتك

[البارق]

- 9 -


قصيدة للشاعر الرائع
رياض الركابي


بعد عطرچ إبطي اثيابنه يفوح
وبعد بوساتچ إتطرّز ادينه
وحشه الليل بغيابچ نگضّيه
او عگب حضنچ ولا ليله دفينه
روج الحزن عالي ، وطاح الشراع
إحسبي ايام غرگانه السفينه
بحديقتنه او وردها ، او فوگ الاغصان
لو تدرين .. چم دمعه لگينه
إبغيابچ .. شمعه صرنه ابرحمة الريح
الف مره اشتعل دمنه او طفينه
اليصبّرنه يگول العوض بالجاي
ما يدري الثلم ، ماخله بينه
صح نضحك .. ولكن ضحك مجبور
واللمّاح ابد ما تخطي عينه
ما انطت ابد حصتنه للغير
ويانه الدنيا بالشوغات امينه
ونگللها اكتفيتي بالاخذتيه ؟
وبعدني اتگول .. وتأشّر علينه
لو بالمال وفيّناها الديون
المطلوب ابعزيزه اشيفك دينه ؟
بدم اگلوبنه او گوّه اشتريناچ
او ملكنه الدنيا من يوم اشترينه
حمامة بيت روحچ كل مسا اتطوف
لو تنباع .. هم تبقى حنينه
مثل مجرى الندى بخدود الورود
ما غثينه احد من بچينه
وذا بطل يهل اهلال عالناس
ذيچ اللحظه گولي احنه نسينه