هنا

[فقار الكرخي]

خيعونكم
الليل لو مركم دفو
وماتبجي بيهه اعيونكم ،،،
خيعونكم
يصبح صبحكم عافيه
وتنسون طارينه ولا لحظه نمر بظنونكم ،،،
انشد وادور كل صبح ياهمه اليشوفونكم ،،،
واعثر هجركم چن رمح يتلگه روحي بدونكم ،،،
خيعونكم ،،،
رحتوا وتركتوني صنم
يـم ديره واحدهــم نبي
وبعيوني خايف لا كفر يقرونكم ،،،
واشلونكم ،،،
يلما نشدتوا اشلوني
لو مر اسمي اشو ماينخطف هالونكم ،،،
واشلونكم ،،،
كوسر حچينه ابلا ظهر
لملم افيايه ايخاف لو مر بي ونس وايخونكم ،،،
جنت ارگض ابچلمة هله
واعثر مراحب دافيه اگبال الحجي البعيونكم ،،،
وجنت انچمع عوذة حسد
وانطش اذا مريتوا ليحسدونكم ،،،
وجنت انكتب صرة حجي
وعفه ونوايا البيضه... يلعفتوني مدري اشلونكم
يالحن...يانغمة ترف... ياهمه اليغنونكم ،،،
يانسمه...ياطبع الغصن...يم فاس لا ايودونكم ،،،
ياماي...ياديرة دڤو
البشر عاميهه الطمع
وانتم زلال الصافي ليشربونكم ،،،
وعيونكم ،،،
بروحي السنابل تنتظر
جيتكـم واسگي ابصبـر
يالغز روحي الماظن ايحلونكم ،،،
وعيونكم ،،،
عطرت روحي بمستحه
من شفت هب ريح الگبح من روح اليشوفونكم ،،،
ومتوني ماتحمل هجر
واشمعنه اشو تحمل هجرنه امتونكم ،،،
بأخر المحطات العتــب
دورت روحــي وضيعت
كل سالفــه المرت لون يلگونكم ،،،
ماعوني چان أمن الملح
وغزر وچان أمن الگبح ماعونـكم ،،،
اليردونكم ،،،
بالعافيه اعليهم تره اليــردونــكم ،،،
بس خايف اشوفونكم ديرة غدر
وتاليهه يم اديارنــه ايشمرونـــكم ،،،

[فاندا البغدادية]

روعة

[سيدة الحروف]

اختيار اكثر من الرائع احسنت فقوري

[فقار الكرخي]

نورتو الموضوع
شكرا جزيلا لمروركم العذب
ودياتي