عنوان الموضوع باللغة الاستونية وترجمتة انا والعكَروكَة ..جماعة زيونة والمنصور ..عكَروكَة يعني ضفدع ...
المهم ..نرجع للضفدع ..قصدي الموضوع ...
في استونيا ...سوينة منظمة انسانية اسمهة Vivak بعد ان ثبتناها بدت تجي دعوات الى مؤتمرات في دول اوربية اغلبهة قريبة مثل لاتيفيا وفنلندا يعني سياقة سيارة ...
فد يوم دعونا الى مؤتمر بس بداخل استونيا ..الجو كان ربيعي حلو بس مطر ...فصار نشاط ان نمشي ونستغل حواسنا ان ندور على اشياء غيرنا مخبيها في مكان معين يعني نستغل حواسنا وان نحاول ندرس تفكير الشخص الثاني ..
أني كانت وياي بنية من فنلندا ..من درت بية عراقي خطية خلصت الوقت تسولف ع العراق وطيبة اهل العراق الى ان كَالت طبيعة طهران رهيبة ...واني لسان حالي يكول ( الزززكَة ) البنية مضيعة بين ايران والعراق ....
فد نمشي وكان الجو مطر قوي ..ولابسين Rain coat فد شي يشبه العلاكة ام ربع بألوان مختلفة ...واحنة دندور لكينة عكروكة دتعبر ( والربيع بأستونيا موسم العكَاريكَـ) بالنسبة لأهل زيونة والمنصور والهورة موسم العكَاريكَ يعني موسم الضفادع ..اشو البنية بدت تصيح Stop Stop Stop ..اني كنت على وشك ان انبطح ...كلت مفخخة والحمزة ...وكفت قريب ع الضفدعة ( اللي ميعرف الضفدع شنو يعني عكَروكَة) ...وطلعت تلفونهة وبدت تتصل ..بديت اسأل شنو اللي صار ...كالت لازم اتصل حتى يشيلون هاي الضفدعة ( فعلا اكو ارقام مخصصة لهذي الفترة من السنة يلمون الضفادع يودوهم لأهلهم ...ماادري وين يودوهم بس يجمعوهم من الشوارع) ...كلتلهة ابوية انتي من فدوة اروح الج وللعكروكة مالتج ...هذا التمرين عليه درجات وراح نخسر ...كالت مستحيل مااتحرك الى ان يشيلون هالمسكين ...بديت اقنعهة ..عيني ترة مطر قوي حتى جواريبي اتنكعت ...اتصلي انطيهم مواصفات العكروكة وشلابسة وهم يجون ياخذوهة خل نروح ...كال مستحيل ...لازم اتأكد انه هالمخلوق يروح بسلام ...كلتلهة بس اني المخلوق راح تصير بية فلونزا ...كالت لا محمد تعذرني ...
المهم ...للأسف ..فكرت بطريقتي العراقية ودست على العكَروكة بحذائي والمسكينة انلزكَت بالطركَة مال الحذاء ...باوعت عليهة وكلتلهة shall we go now ......خطية بدت تبجي وراحت..واخر كلمة سمعتهة منهة كانت terrorist
أنتهى
رد مع اقتباس
المشاركة الأصلية كتبت بواسطة امير العتم والظلام
