غريبة اطباع شكلچ والوصف ذباح
شفت رقة وجمال مخالط القسوه !ً!
طبع حر وعِلا والعين للشاهين
شرسه بغيرتچ وتشابهي اللبوه
انتي اول عشگ مر بشتاء الروح
يا ليل السهر يا مُختصر حوه
خلني بطرف عينچ مروّد ومرسول
يا مكدره الرجال وغايضه النسوه
مو معقولة انتي شكُثر حلوة اليوم
وانتي بكل صراحة كل وكت حلوه
تروح العين فدوة لل يصيبوچ
وبقايا العمر كُله يصير إلچ فدوه
تواعدني ابغفل وتريد مني احتاط
شلون احتاط واني محضر لغزوه
وانتي القفر تحتچ طگ عشب و ورود
والماي العكر صارت اله رغوه
إلچ حكم التتر وإسهام تاخذ روح
وإلچ هيبه ومهابه وجندله وقوه
شكل انتي حبيبي شگد حمل مضمون
وفوگ الخصر بانت عندچ السطوه
اشد إحبال صبري وترتخي وياچ
شيصبر المعّيّد من تجيه عطوه
حالي اني من اشوفج ينشده فد نوب
مثل اطرش جلس مجبور في ندوه
يا نجم الهدى وسارت عليه ركبان
سبحانه الخلق من نجمچ القدوه
أطير من الفرح لمن تمري إطيوف
وأصير اختاض طفل وتمسكه العدوه
تبعثرني نظراتج والليالي شهود
يا مقبض السيف ونوخذه وعروه
تدرين أعلى بالي من تجي شيصير ؟
اركب الباص وأنسى ادفع الكروه
رد مع اقتباس
المشاركة الأصلية كتبت بواسطة Gogo alkordea
